馮仁昭四圍超：賀相識20年 周慧敏搞新意氹倪震
周慧敏、楊千嬅、鄧麗欣同周麗淇噚日一齊出席喺又一城舉行嘅「中國女童教育慈善義賣揭幕禮」，40歲玉女掌門人周慧敏果然有大家姐風範，佢一身白色tube dress 打扮，好鬼搶鏡，雖然千嬅同樣以全身白色裝束示人，不過由於太過密實被比下去。周慧敏自己話好滿意而家嘅身材，因為瘦咗又弗咗，提到明年係佢入行20周年，咁岩又係佢認識男友倪震20年，佢話：「有朋友叫我不如搞啲新意思，好似搞個騷或者影吓寫真咁，不過我唔知自己仲有冇市場，我唔sale 性感喎！」馮仁昭話佢同倪震相識咗20年，不如搞結婚咪仲好，周慧敏笑笑口話：「唔會啦，不過會搞啲慶祝嘅。」
楊千嬅挽著自己設計嘅手袋義賣。
周麗淇為中國女童教育慈善義賣籌款，噚日仲同小女孩開心合照。
千嬅嘆相處難
另外，楊千嬅喺活動入面話作為女仔要識保護自己，咁千嬅喺感情上又識唔識保護自己呢？佢話：「有啲嘢係人生經歷，感情要互相包容同遷就，兩個人相處係好難嘅學問。」問到緋聞男友丁子高係咪好爸爸？千嬅話都唔關事，不過佢自問會係個好媽媽。周麗淇就話做女人要靚之外，仲要有智慧，而佢啲智慧仲增長緊，問佢係咪因為冇乜智慧，所以爭輸咗？周麗淇睩大眼仔話：「吓！爭乜呀？我冇賭錢喎，冇輸錢呀！」唔通佢當咗過氣男友鄭嘉穎係籌碼。
周慧敏話會同男友倪震（小圖）喺下年搞慶祝賀兩人相識20年。
