第一次入圍金鐘獎就嗱到視后嘅林依晨，開心到成晚嗱住個獎唔願放手，《惡2》男主角鄭元暢更上台吻賀。
《命中注定我愛你》創下台灣史上最高收視劇集紀錄，女主角陳喬恩何止成為炙手花旦，喺上個禮拜五（十月卅一日）舉行嘅「第四十三屆電視金鐘獎頒獎典禮」，至高無上視后寶座，全城睇好陳喬恩十拿九穩。
可惜，當宣布得獎者係《惡作劇2吻》嘅林依晨，爆冷賽果全城嘩然，但出爐視后林依晨有理無理，風騷發表得獎感受：「演《惡2》我做了很多功課，拿這個獎我不會心虛。」勁得戚。
知道陳喬恩落選，阮經天第一時間埋去安慰，兩個除咗係熒幕好拍檔，私下感情仲相當之好。
成為大輸家嘅陳喬恩，喺後台露出落寞神情，笑都笑唔出。
輸馬鼻
至於陳喬恩嘅落敗原因，金鐘獎女主角評審組召集人汪威江解釋：「陳喬恩與林依晨分數一直在纏鬥，最後我們選林依晨，是因為她在戲裡獨挑大樑；陳喬恩表現也很好，演員搭配較完整，林依晨相比之下，顯得特別辛苦，所以陳喬恩落選是非戰之罪。」
至於啱啱廿六歲生日嘅林依晨，自稱只以平常心參賽，反而阿媽特別緊張，專登走去龍山寺求平安符，保佑林依晨可以順利封后，今次證明，拜得神多真係有神庇佑。
喺頒獎禮第二日，陳喬恩寫blog 向《命》劇台前幕後道歉，怪責自己唔能夠上台嗱影后，無機會感謝每一個喺劇中幫過佢嘅人。
眼濕濕
被一致睇好穩奪視后嘅陳喬恩，當大會宣布林依晨封后，《命》劇男主角阮經天第一時間跑到陳喬恩身邊，捉實佢隻手不斷安慰話：「沒關係，未來十年、二十年都還有機會。」
對於大熱倒灶，賽前以為自己嗱硬嘅陳喬恩，喺慶功宴上無晒心機兼眼濕濕，佢仲好坦白同記者講：「老實說，我有一點失落，對不起，我沒有辦法上台領獎。」陳喬恩表現尚算冷靜，但佢經理人孫德榮嬲到發火大鬧：「我們為什麼要像猴子一樣被耍。」
做咗十二年《我猜》主持，吳宗憲終於嗱到金鐘主持人獎，仲話廿年演藝事業可以有個交代。旁為《我猜》另一主持人阿雅。
頒獎禮前夕，依晨媽去龍山寺求咗道平安符俾囡囡，祝佢順利嗱視后，果然靈驗。（《台灣蘋果日報》圖片）
亂講嘢
除咗影后獎項觸目，「娛樂綜藝節目主持人」獎同樣係焦點之一。
身為綜藝大哥嘅吳宗憲，由佢主持嘅《我猜我猜我猜猜猜》播足十二年，但一直無緣喺金鐘獎台上嗱主持人獎，舊年仲因為輸俾陶晶瑩主持嘅《超級星光大道》，嬲到話以後唔再玩金鐘。
吳宗憲自爆主持《我猜》獲益良多，十二年以來，收入進賬三億台幣（約7,500萬港元），足夠佢買六幢豪宅，但最遺憾係未嗱過金鐘獎，恨獎恨到講埋出口。
結果吳宗憲願望成真，摘下金鐘主持人獎，當晚開心到連跑兩場慶功，飲大兩杯開始語無倫次，勁鬧周杰倫：「我也要趁這個機會，警告一個人，不准再和我炫耀你可以得多少獎！周杰倫先生，最佳節目主持人獎，你不要說這輩子，你這三輩子都拿不到！」
