Change
美國兩位總統候選人，開口埋口都話change ，變好變壞不是問題，總之你悶我就變，好過摺埋。上一套《007》將占士邦重新執位洗牌再嚟過，你問我，即使人人話《皇家賭場》耳目一新，我始終喜歡舊嗰套：蝙蝠俠、蜘蛛俠、鐵甲奇俠，個個英雄都有黑暗面，都有人性，都有現實層面困難，辛唔辛苦呀？你俾兩個鐘頭我，乜都唔諗，睇吓一條友邊扮型邊殺人邊上床邊講笑，幻想一下自我安慰一下，得唔得？唔得！因為大家對辛康納利、羅渣摩亞式超現實特務已經睇厭，情願睇一個氣質似地盤工人，打交時真係會出汗同你老豆或男友無分別的尋常人。大家要的，是共鳴，不是投射。
《皇家賭場》變革成功，《量子殺機》在情節上follow up ，但真正有關係的，又唔係咁多，你要知道007好搏命去搵仇家報復，就夠了。落入Marc Forster 手，007比以前任何一齣來得更平實。奸角無造型無氣勢，床上戲比教育電視生育課節目更無睇頭，唯一具備《鐵金剛》色彩的，是女角被石油搽身而死的一幕，向《金手指》致敬，動作場面雖然玩轉海陸空，飛車追艇爆飛機，出齊，但無誇張似《Die Hard 4.0》咁戰機過隧道之類。勝在剪接出色，參考了《叛諜追擊》，但減少搖鏡，將不同畫面穿插，成功用動作代替對白交代劇情。我一直懷疑，動作場面越來越大是否荷李活電影不歸路？大家已經對一般飛車追逐埋身肉搏火海逃生無乜興趣，今次由一位拍開文藝片的導演來推翻講法，證明開拖都要有原因有劇情推進至吸引的，否則，不用睇戲，睇K-1好了，雖然，如果有劇情推進而畫面又夠誇張，就更好。
純粹個人口味，見到007今次打擊犯罪集團，用上以暴易暴手段，實在有點納悶。或者，這才是現實需要，2008年了，你估是1978？奸角會先將好人生擒然後傾下心事，就係唔開槍射你等你有啲時間走甩換過套衫再揪過？今日，大家只會一埋牙就砌。仲同你講儀態講優雅？
好快，大概連007都唔會著禮服了，節奏越來越快，著波鞋吧，無論著草定上床，都方便啲。唔靚？還有人欣賞靚嗎？
