此團要自費才可到出名的海灘亞龍灣，但導遊收費掠水，較自己買票貴得多。
金融海嘯，各行業都割價求存，重災區的旅行社要跳樓價辦團，其中關鍵更推出$199的海南島五天團。
嘩！究竟有無咁大隻蛤
隨街跳？本刊記者親身報團體驗，查證這些平價團是否抵玩。
好多景點都係從車上睇，想影相？好難。
Day1 坐車十粒鐘
五天團包食包住只收$199，當然唔會坐飛機咁歎。朝早八點鐘便要在深圳集合，全團四十人，有十幾名香港人，內地導遊負責帶團。
第一站到湛江，但車程要十個鐘，加上座位狹窄，令到個個團友頸梗膊痛。結果全日冇得觀光，兩餐都係草草搞掂。
團友被棄在街個半小時，部分人誓言回港後向旅行社投訴。
Day2 變臉導遊
朝早要坐三個鐘船去海南島，當地導遊首先笑面迎人，表示要去四個自費景點，盛惠三百四十元。有團友選擇不去，導遊立即黑面：「章程的景點係會去，但全部都只係旅遊巴經過睇吓㗎咋；你哋唔去景點，都唔知嚟海南島做乜！」完全與宣傳單張上寫著的「全程欣賞地方名勝，絕不走馬看花」不符。
是日傍晚沒付款參觀植物園嘅團友，更被拋棄在購物點，當時店鋪已經關門，並突然下起大雨，附近又漆黑一片，兩個導遊亦告失
，令團友十分狼狽。
提提你：導遊的收費搵笨，如去亞龍灣，團友須付六十元入場費給導遊，但實情即場買票只需三十三元，故建議到達景點後，才自費入場。
貌似軍人的推銷員拿起菜刀又劈又砍，嚇得團友心驚膽跳。
Day3 好戲推銷員
今日行程話去多個景點，但其實帶你去購物更多，第一站去軍刀廠，一名穿著軍裝的推銷員，猛吹其公司與軍用刀關係密切，之後拿出一把刀來刨皮，十足吉之島的推銷員般邊賣藝邊促銷，「呢把刀叫多功能魔術刀，可以切青瓜絲、蘿蔔絲、冬瓜絲、節瓜絲、買咗唔使練武功。」看後團友紛紛落疊。
接著導遊再帶團友到寶石店，寶石店老闆龍先生自稱在廣東出生，因此對我哋有親切感，所以今次只教分辨寶石真偽，不會逼我們買珠寶。
他更踢爆平價團掠水手法，「$199包食包住，邊有咁大隻蛤
隨街跳，其實是購物點的公司俾錢旅行社，買你哋嚟幫襯，實情佢哋賣嘅嘢貴好多，質素又差，刀廠的刀好弱㗎咋，千祈唔好買。」
團友見龍老闆大踩其他購物點，即時大快人心，又不硬銷寶石，令人以為他老實，誰知他離開後又回來，才露出狐狸尾巴：「見你哋係香港人，今次紅寶石鏈同戒指只賣五百、三百。」認真吹脹！
提提你：跟團購物買手信肯定買貴咗，以椰子糖為例，導遊帶去的鋪頭，折後賣十元；但同款產品，在超市只賣六元半。
每餐伙食都麻麻，團友每晚都會自行出外消夜。
Day4 火滾全齋宴
雖然這幾天的伙食不算是佳餚，但至少有魚有肉，惟今日晚餐卻令人咋舌，八個餸之中，七款都是瓜、菜、豆腐、芽菜，團友極之不滿導遊的安排，「嘩，乜我哋食齋宴咩，無肉嘅，凍冰冰點食呀？」
過半團友飯後相約出外消夜，食了多款海鮮，每人只需二十多元，既惹味又抵食。
Day5 與豬同船
朝早八時由海南島起程，與豬同坐一艘又舊又臭的船回到湛江，根本不是單張介紹乘坐的大船「粵鐵號」。
午飯後全速直駛深圳，由於預計晚上十一點才到深圳，故團友又要自費三十元食晚飯，最後又因趕不及羅湖過關，被迫去皇崗口岸，凌晨一時才解散。
總結
表面上團費是$199，但其實還有很多必須的收費在內，即使不參加任何自費活動或購物，總成本亦逾九百元。而這五天其中三天是搭車，一天半瘋狂帶團友購物掠水，實際只有半天可欣賞風景，很多團友都話貼錢買難受，以後咪制。
其實由香港坐飛機去海南島嘅平價四日旅行團，連雜費亦只收$1,619，但就舒服得多。表面看似玩少一日，但其實慳咗好多交通時間。
旅程總費用
團費$199
保險$189
燃油費$75
酒店稅$39
導遊費$300
兩餐自費晚餐$130
總共$932
提提你：保險費必須跟團購買，除非你已買了全年旅遊保險才可豁免。
超平自由行
既然超平旅行團不太吸引，想慳又要玩，倒不如買平價自由行套票。
