從事理髮行業廿多年的陳創業（站立者），於八十年代曾參加亞洲髮型化妝大賽並奪得冠軍。其後在元朗開設「勁髮廊」，建立其廉價剪髮王國。
元朗有一間髮型屋「勁髮廊」，十多年來在當區堪稱無人不識，連該髮廊髮型師亦揚言：「我哋陪住好多元朗人成長！」
髮廊由有廿多年剪髮經驗的陳創業主理；如此把炮，只因一個字：平。「勁髮廊」有四間分店，其中一間剪髮只需三十八元，包洗頭吹髮，比坊間那些五十元齋剪十分鐘的速剪店更平！平招除吸引元朗十多歲的學生哥、三、四十歲的中年麻甩，以至七十歲的婆婆來幫襯外，還引來非常慳錢，只會互相幫忙剪髮的外傭前來光顧。在薄利多銷下，每月盈利八萬元。
以洗剪吹三十八元作招徠的勁髮廊大馬路分店，其中三成顧客為外傭。
「阿傑幫呢位小姐洗頭！」「先生想點剪呀？」「阿康沖水呀！」……六位髮型師於上週日的下午，不停在店內將上述說話重複一遍又一遍。兩層高的鋪內，擠滿了逾二十名客人，人多得連等候的座位也不夠，要加開多幾張摺櫈。
記者觀察，輪候者以男士居多；髮型助理平均十分鐘便洗好一個頭，髮型師十三分鐘剪好一個髮，計及吹頭造型的時間，整個過程只需三十五分鐘左右。客人的櫈還未坐暖已剪好，下一個又再殺到。
圖中的造型劑，專供電髮人士使用，此產品能使頭髮自然有彈性之餘，亦能保濕。$80/ 支
一般髮泥就算用洗頭水都難以清洗，但圖中的水溶性髮泥用清水一洗即甩。$75/ 盒
攻佔外傭市場
這間人流多到爆的「勁髮廊」，在元朗有四間分店，最旺的分店在元朗大馬路大橋街市對面，此店收費亦最平。鋪前玻璃掛著大大塊寫著洗剪吹三十八元的大海報，進進出出的不單有阿婆阿叔，還有平時只會互替同鄉剪髮的外傭。「其實外傭都想坐喺髮型屋舒舒服服咁整頭，不過通常嫌貴無機會做。呢度定價三十八蚊，鋪頭又喺街市附近，好多外傭買完餸就過嚟整頭。佢哋佔鋪頭三成生意㗎！」陳創業解釋其定價策略時道。
大馬路鋪的經理阿Ken 說，這些外傭每次都與同鄉連群結隊幫襯，其中有一半會加做負離子及染髮：「佢哋啲頭髮鬈啊嘛，咪入嚟染埋啡金色頭髮同做負離子。如果幫佢哋整頭整得好，班外傭會俾貼士添！我試過收成一百蚊，闊綽過好多香港人。」在該鋪電髮收費二百二十元，而染髮則為一百六十八元，兩者都包洗、剪、吹，同樣平絕元朗。
每逢假日，各間勁髮廊分店均有約一百名顧客幫襯，其中大部分為學生及男士。
員工薪金 人頭計數
除了菲傭，來幫襯最多的，普遍是要求不高的男士。第一次到「勁髮廊」染髮及剪髮的Jerry ，經住在元朗的朋友介紹前來幫襯：「我喺出面試過用六百蚊剪髮，個髮型師懶係有自己style ，我嘅意見完全唔聽！呢度就唔同啦，大家有商有量去剪，所以好滿意！」
事實上，九成客人進內都是「齋剪」居多，少有電髮染髮。由於價平，最重薄利多銷，故剪髮一定要夠快，顧客主動提意見更好。而陳創業亦採包薪加佣金制度，如員工每替一個客人洗頭，可得八元、剪髮、電髮、染髮等，則按客人選擇藥水牌子釐定抽取佣金比例。有髮型助理表示，如客人選擇價值四百多元的黑人牌藥水電髮，佣金可達六十多元。有佣收，員工自然快手落力。「勁髮廊」的營業時間亦特長，由早上九點，直踩至晚上十一、二點。陳創業說：「而家元朗好多夜鬼，又有啲人喺市區返工，好夜先返到嚟元朗，其他髮型屋通常八點已經閂咗門，要剪頭髮就一定要嚟我哋度。」
鋪內髮型師大多是二、三十歲的後生仔，陳創業還自置物業，以月租數百元提供宿舍予十位居於外區的員工：「佢哋一來一回車費貴之餘又費時，所以我買了兩間約六百呎的唐樓，再租俾佢哋住，方便之餘，又可以監察住佢哋，等佢哋唔會『射波』（曠工）。」而陳創業亦不喜歡客人來剪髮時指定師傅，故指定師傅的收費為一百零九元，較少人選擇；他更特意將髮型師在不同分店調來調去，避免髮型師自抬身價，「如果好多人搵某一個髮型師剪髮，咁第時就變咗我要聽佢講嘢。到我想減價或做其他宣傳時，佢一個唔肯合作就好麻煩啦！」
元朗千色廣場對面的勁髮廊，營業時間極長，達朝九晚十一。由於未有大事裝修，故外觀只屬一般。
壓縮開支保利潤
陳創業另邊廂亦要盡量將成本壓低。鋪中的洗頭水購自批發商，一百元一桶，可用一百次。四間分店每月均會一次過大量訂貨，提高優惠。而髮型屋的主要成本，除了髮型師薪金及入貨外，還有水電。前者不能慳，後者陳創業則將冷氣機由水冷式換為分體式。「以前每間鋪電費要成萬蚊，現在則因此減到七千五。」
「勁髮廊」在「頭如輪轉」下，三十八蚊的剪髮價利潤為四成。「勁髮廊」另外三間分店，定價為洗剪吹連服務費六十六元，利潤為六成，仍比元朗一般髮型屋洗剪吹收約八十元便宜。
去年十月，元朗市中心開了一間速剪店，五十元單剪十分鐘，陳創業表示該鋪的出現對其生意並無影響：「嗰啲鋪只係適合俾啲完全無時間剪髮嘅人幫襯，而我哋就提供一個較舒適嘅環境俾人客坐低洗頭剪頭髮，適合要平又要舒服嘅人。」
陳創業喜歡踢足球，本週日他便駕著其波子坐駕到旺角與朋友練波。
梗有一間喺左近
四間分店的分布原來亦有學問。除了其中一間在街市附近，另三間分別在元朗千色廣場對面、附近的紅棉圍路及元朗廣場附近，「覆蓋點」正好包羅整個元朗區居民，陳創業指千色廣場及元朗廣場，可以買齊日常所需及潮流服飾，元朗人必行。「住元朗東如YOHO Town 嘅人，通常會向西面行，去千色廣場買嘢然後返轉頭；而住元朗西如御豪山莊嘅居民，就通常向東面行去元朗廣場購物，行過就會經過我哋康景街分店，所以成個元朗區嘅人都知道我間鋪嘅存在！」
曾獲亞洲髮型化妝大賽冠軍的陳創業，當初想到薄利多銷，完全是「馬死落地行」之舉。原當髮型師的他八七年自立門戶，九三年某天，一眾髮型師另起爐灶突然集體辭職，陳創業即時被蹺起。由於當時只剩未學滿師的新進髮型師，故陳創業將當時元朗平均剪髮價七十八元劈至四十六元，吸引顧客。這招果然奏效，除劈價第一個月蝕一萬元外，其餘打個和，到第五個月已有錢賺。
「勁髮廊」安全度過九七金融風暴及○三年沙士，陳創業說：「雖然當時選擇電染的人客減少，但齋剪髮的客量卻上升一成，令整體生意未受影響。我相信今次金融海嘯都一定捱得過！」
Before
After
模特兒的頭髮經陳創業用風筒、髮夾及圓筒梳處理，不消半小時，已由直（左下圖）變鬈（右下圖），收費只當普通洗頭價$29計。
