馮仁昭四圍超：同來自夏威夷 Jocelyn 籲奧巴馬停戰
美國大選塵埃落定，奧巴馬大熱當選成為美國史上首位黑人總統，身為美國公民嘅「翻版關之琳」Jocelyn 大讚奧巴馬眾望所歸，投咗佢一票嘅Jocelyn 話：「我已經投了票，當然是投給奧巴馬啦！因為他能夠停止戰爭。他來自夏威夷，也有點感情分數，他在我們夏威夷十分出名的，他好人又孝順，大選前夕也回來探病重的外婆，令我們很感動。」張天愛嘅老公王盛德（Russell ）係美國公民，但佢話揀唔落手，放棄投票，張天愛話：「老公Russell 可以投都冇投到，真係揀唔到，兩邊都唔安全！我哋心水配係希拉莉加奧巴馬，奧巴馬係強勢，但佢冇外交經驗，佢嘅政策係上層富有嘅、中層嘅都要落嚟，幫啲窮人上去，唔做嘢政府都應該派公援，但係奧巴馬上台後係冇錢使，經濟咁差，點可以咁派錢？所以寧願唔投票。啲黑人嘅種族歧視仲厲害過白人，一年後如果美國都係冇錢，怕會有暴力事件發生。」Ana R.也有投票給奧巴馬，佢話：「好開心見到美國有新轉變，雖然少少擔心有種族主義，但我們是新生代，可以接受黑人總統，我更愛她的太太，形象很好，又勤力工作。」
Ana R.盡美國公民責任，投咗奧巴馬一票。
張天愛同老公王盛德（小圖）因冇心水候選人，最終放棄投票。
「爛攤子好難搞」
劉德華噚日出席活動時話：「無論邊個當選都好，希望大家支持佢，因為未來四年係嚴峻考驗，邊個贏都辛苦，呢個爛攤子好難搞。」王晶就話：「我支持奧巴馬，大家共度時艱。」李澤楷舊愛羅愛欣話：「我支持奧巴馬，美國要一個後生嘅人領導，佢當選可以帶嚟轉變。如果係麥凱恩當選，又會去番布殊個style ，係唔work 嘅。」
「翻版關之琳」Jocelyn 熱愛和平，投咗唔主張戰爭嘅奧巴馬一票。
