揚明跟圈外女友Elaine 相當癡纏，Elaine 更曾把二人的啜嘴相放上交友網Friendster 晒幸福。如果揚明真係因為飲醉酒掌摑女友就真係好冇品喎。
泰林執笠，代言人「賣飛佛」吳卓羲即被網民寸爆佗衰家，其實諗吓諗吓，同阿佘傳過緋聞嘅人都冇乜邊個有好下場。好似N 世前俾「佘」纏過嘅揚明，唔知係咪做得臭飛仔多，現實成日醉酒鬧事，FBI 最近仲收風話揚明喺今個月19日凌晨同一班TVB 藝員喺老蘭飲大兩杯後，有人當街掌摑女友，搞到女友要報警咁滯。
2年前，揚明已因為打人被判過守行為，FBI 聽聞今次女方考慮到男友星途低處未見低，最後決定唔告佢。FBI 都打過畀揚明問佢係咪打女友，揚明否認：「我係有出去飲酒，不過我洗心革面㗎喇，你地唔好搞人啦……係唔係嘅差佬講㗎？我真係洗心革面㗎喇，唔會飲醉……」係就好，打爛仔交都話你man 啫，打女人，驚你衰唔起。
做親都衰可能私底下形象差，揚明喺《家好月圓》（圖左）飾演Jimmy 仔，為錢多次威脅奸嘉美；喺《原來愛上賊》（右圖）又做強姦犯想搞陳茵媺，冇個好人。
