求驗客手記：英國稅重 咸姆頓瑞士嘆世界
英國車手咸姆頓嗱咗一級方程式（F1）世界冠軍之後，人工將會加到1億鎊（約12.5億港元）之餘，仲有望
埋部dream car 麥拿侖F1LM ，真正名成利就。以為佢會衣錦還鄉嘅時候，點知佢決定唔返英國住，繼續留喺瑞士。無他嘅，鬼叫英國稅重咩！呢個禮拜啲黑人認真威，奧巴馬今日有望入主白宮做美國總統，而23歲嘅咸姆頓就比奧巴馬早幾日上頭條，喺禮拜日好戲劇性咁嗱咗F1總冠軍，仲做埋F1史上第一個黑人兼最後生「1哥」。咸姆頓效力嘅車隊麥拿侖當然識做，據報首先會加佢人工，將佢過份為期5年、每年價值1,000萬鎊合約加到每年2,000萬鎊。
3冠王可
6千萬元跑車
咁都未算，麥拿侖老細丹尼士仲承諾，如果咸姆頓佢嗱多兩次世界冠軍整個帽子戲法出嚟，就送佢最夢寐以求嘅麥拿侖最強戰車F1LM ，價值500萬鎊（約6,250萬港元）添！咸姆頓話：「可以兩奪世界冠軍固然好，但我更加想獲得過部dream car ，所以我一定要3奪世界冠軍！」試想想，咸姆頓個身袋住張1億鎊嘅支票，再揸部超級戰車同女朋友妮高遊車河，真係未出發先興奮。之但係，佢嘅車河唔會喺倫敦大笨鐘度遊，反而喺瑞士少女峯，點解？因為佢唔喺英國住嘛。咸姆頓真真正正做咗「黑帝」，英國車迷都希望佢可以由瑞士搬番英國住，但好唔好彩，個答案並唔係佢哋想要嘅。如果咸姆頓住喺瑞士，基於瑞士嘅稅制比英國輕，所以佢每年至少交少400萬鎊稅，亦因為呢個理由，佢決定喺瑞士住多一段時間。我求大俠明白英國車迷會失望，但英國以往啲F1星級車手好似係古達、畢頓同埋嗱過世界冠軍嘅文素，都唔係住喺英國，所以咸姆頓有咁嘅決定亦好正常。
F1LM 跑車小資料價值：約6,250萬港元最高時速：225哩最大馬力：680匹
