藝人講股：張智霖睇定至入市
張智霖（Chilam ）同袁詠儀（靚靚）兩公婆對投資股票都有研究，但佢哋財政完全獨立，買股票都係分開買自己心水，所以有時靚靚賺錢，老公會輸錢。噚日陸菲特打過電話畀岩岩喺印度返港嘅Chilam ，問佢呢排有乜買股心水，點知佢話：「呢排個市咁波動，入市氣氛唔係咁好，所以我都冇入市。」Chilam 認為呢排個市升番少少，只不過係小陽春，所以股民要小心，唔好衝動入市，最好再睇定啲！佢話：「幾年前喺科技股熱潮，我大膽入市，結果科技股爆破，損失咗六位數字嘅錢，幾肉痛，自此我買股票好小心，唔會再做羊群，對每一隻股都小心研究。」而家Chilam 最心儀嘅股票係中移動（941）同匯豐（005），但暫時佢手頭上冇呢兩隻股票，佢話：「早排有日兩隻股跌到好低，但我冇時間入，走咗寶，而家又升番，唔係我入嘅目標價，我會再等吓，等氣氛好啲再入市。」撰文：陸菲特
