被喻為全球四大選美之一嘅國際小姐，今年移師澳門威尼斯人酒店舉行，63位佳麗上週殺到香港，行為出位過亞姐，唔多國際搶獎最實際！
對手勢凶夾狼，得162cm 全場最矮嘅香港代表馬賽已經執輸過人，身形蝕章，塊面仲嚇鬼，生晒粒粒粗過雞皮紙，據知馬賽為急救靚樣不惜服食可用作避孕的藥物，希望短時間內回復光滑，不過避孕藥醫暗瘡治標唔治本，馬賽都係
聲睇醫生穩陣喇！
千粒瘡
馬賽選港姐時已經粒粒生滿面，曾搵陳方安生細佬、著名皮膚科醫生方慶生求救，不過近日臨選國際小姐，竟然又爛面，馬賽說：「我響日本食蜂膠敏感，而家冇時間去睇醫生，都係自己買成藥食！」問佢係咪食避孕藥，馬賽就口窒窒話：「唔係……普通成藥啫！」不過食邊隻成藥佢就係都唔肯講。
要醫生處方
皮膚科名醫史泰祖：「蜂膠係天然食品應該唔會引起敏感，機會好微；而女性出現成面粒粒有好多可能性，其中可能係內分泌失調、壓力太大等，可以採用由醫生處方嘅荷爾蒙藥，最普遍是服食用嚟避孕嘅避孕藥Diane-35去改善情況，嚴重者可以用維他命A 酸治療，但因為藥物有強烈副作用，且會導致畸胎，所以孕婦忌服。」
小矮人
馬賽（右二）報稱有162cm 同全場最高嘅加拿大小姐Elena Semikina （左二），身高相距成20cm ，接近兩罐可樂，馬賽企埋隔籬明顯矮人一大截，難怪有網友話應搵178cm 嘅冠軍張舒雅參選！
急移位
馬賽身材太矮俾人遮住晒，響澳門遊覽大三巴影合照時，要工作人員叫佢行前
響前排，不過
響13號捷克佳麗隔籬仍然十足小矮人，馬賽身材有幾蝕底一眼睇晒。
露咪勁過亞姐
今屆63位國際小姐候選佳麗索唔索好難講，不過佢哋大部分博出位好有計，講招數一定勁過亞姐班國內同胞，所以話全世界女人都係一樣，爭嘢根本就係天性！
鬥漏咪
台北小姐丁燕妤（左）自稱選完就會同hit 爆電影《海角七號》男主角范逸臣合作，響上週六（1日）丁燕妤就住住件金色低V 搏到盡，同場比利時小姐Charlotte Vanbevijver （右）夾攻，中間位法國小姐Vicky Michaub 想抖吓氣都幾難。
晒白底
加拿大小姐Elena Semikina 都唔輸蝕，明知有過百支鏡頭隊住，都夠膽死響巴士上擘大隻腳危坐，預咗走光，係估唔到事後俾工作人員狂
叫佢唔好再搞事啫！
你最黑
贊比亞小姐Chipo Mulubisha 真空坐巴士巡遊時，結果成件衫吹起，搞到終極走光已經夠黑，之後又自稱屋企大把貨黑咭任碌，不過見佢拎住個老翻LV 嘅「LVV 」（右下圖）袋周圍行，唔通LVV 係贊比亞名牌？
烏卒卒
德國小姐Katharina Bondarenko 見難得有人影佢，梗係好風騷咁狂擺pose 慰勞吓大家，點知佢個胳肋底烏卒卒，一堆短刺海膽應該keep 咗幾日。
喪煲煙
希臘小姐Sosia Roditi 冇嘢做坐埋一邊擘髀扯煙，睇佢食煙個自然流露樣，唔知點解令我以為自己去咗葡京沙圈添！
海嘯佳麗 唔知米貴
全球金融海嘯，冰島又話要破產、南韓又話要國際貨幣基金會援助，連日本都話要減息刺激疲弱經濟，不過一班國家陷於財困危機的候選佳麗，似乎對海嘯冇有怕，個個仲自稱自己屋企好有貨，唔愁冇錢使。
狂碌咭
俄羅斯佳麗 Ekaterina Grushanina
「我屋企開保險公司，自己教跳舞，唔覺得國家有危機。張信用咭都係屋企畀嘅，嚟香港買嘢都係碌咭，自己只係帶咗少少美金傍身！」
發星夢
中國佳麗 劉暢文
「我爸爸係大學計算工程系教授，媽媽亦係體育系教授，家姐正讀碩士，我哋經濟冇問題呀，我想入娛樂圈做明星，我對娛樂圈好有興趣。」
歎遊埠
烏克蘭佳麗 Julia Galichenko
「我daddy 係國際公司老闆，國家冇經濟問題，自己都成日周圍飛去旅行，剛剛先去完法國，國民生活仲好富裕喎！」
諗掃貨
日本佳麗 杉山恭子
「我自己啱啱響波士頓讀完書返嚟，身邊朋友都冇財政問題喎！我今次都帶咗好多錢嚟香港買嘢呀，都唔覺得國家出現經濟危機。」
