藝人講股：鄺美雲大藍籌愛建行
金融海嘯雖然令到唔少人損手爛腳，但娛樂圈富婆鄺美雲（Cally ）就冇得頂，唔單止冇蝕錢，仲可以賺錢離場，陸菲特都冇辦法唔讚吓佢醒！噚日打畀Cally ，問佢有冇入市，因為噚日個市都升咗375點，恆指已去返成14344點啦！不過佢始終係穩陣派，覺得呢輪個市仲會好波動，唔係入市最好時機，佢都勸股民唔好咁衝動。採取穩守突擊策略嘅Cally 主要入貨都係買大藍籌股，佢話：「我都係會買港交所（388）同建設銀行（939）呢啲優質股票，呢兩隻股我喺海嘯前就放咗，算係搵咗啲啦！呢幾日睇住個市上上落落，我冇乜心水，所以都係唔入住，其實股市好多嘢係控制唔到，反而做生意可以摸到路，所以而家我都係主力做生意，唔係去炒股票。」撰文：陸菲特
