中環在線：摩通CEO來港傳授心得

中環在線：摩通CEO 來港傳授心得
  
金融海嘯令不少百年銀行老店倒閉或易手，但美資大行摩根大通，非但冇被巨浪跌，仲一再權充白武士，先後拯救貝爾斯登及華盛頓互惠銀行，呢位咁傳奇嘅集團行政總裁戴蒙（Jamie Dimon ），當然吸引唔少仲喺市場中打滾嘅本港金融才俊，想一睹佢嘅風采。
四季設宴會名人
華華聽聞，原來戴蒙正在城中，噚晚喺四季酒店搞咗個酒會同晚宴，請埋摩通喺全城嘅客仔同名人，聚首一堂，唔知佢老哥有冇即場過幾招，將抵禦金融海嘯嘅心得，同嘉賓分享呢？呢位曾被傳媒形容為華爾街魅力型男嘅CEO ，06年起，先至坐上摩通呢個寶座，佢曾經同花旗集團前主席韋爾（Sandy Weill ），成為合作無間嘅黃金組合，但最終拆夥。戴蒙離開花旗，轉戰美國第一銀行，後嚟美一銀行被摩通收購，締造佢最終掌舵摩通帥印之路。