打工仔又好老闆又好，面對嘅咁嘅時勢，人人壓力大過天，可以上嚟展才事業輔導服務解開心鎖，仲冇乜經濟負擔添！
不過其實搵到工嘅又或者自僱人士，呢排打開報紙，睇到嘅唔係XX 公司執笠就係YY 公司醞釀裁員減薪，唔知幾時輪到自己，勁大壓力一樣唔好過。香港職業發展服處就提供一個「展才事業輔導服務」，為20歲或以上各行各業各階層排解工作疑難同情緒困擾，只要打電話預約，大概7至10個工作天就可以安排合適專家同你單對單見面。每次以一小時為單位，一次傾唔晒可以再預約。由於有公益金贊助，所以月入$6,333或以下低收入人士，每小時輔導收費可全免，月入$6,334至$15,000每小時輔導收費只係$80，月入$15,001-$25,000收費$120，其餘按薪酬比例收費。服務處中心培訓主任陳小姐就話﹕「其實待業或在職人士喺呢啲動盪時期，係十分需要心理上或者實質上幫手。無論係唔識寫求職信、又或者工作時間有乜情緒困擾，驚被人炒而戰戰兢兢，我哋一收到電話，就會先了解來電者嘅問題，再安排個別專業心理輔導員或註冊社工，面對面同佢哋解答有關疑難，總之希望打工仔可以紓壓同搵到出路。」一般心理輔導，每粒鐘要收成$500至$1,500（視乎所需輔導內容及輔導師名氣資歷而定），家陣免費幫打工仔醫心病，真係唔好錯過！
喺旺角廣東道嘅輔導中心，非常就腳，方便打工仔老闆解疑難。
輔導時間：逢星期一至日9am-5:30pm
查詢電話：31658870
地址：旺角廣東道982號嘉富中心20樓2室
