面對逆境更加要積極面對，勞工處青年就業起點（葵芳）（圖示）就有個歡迎自僱人士參與嘅免費課程。
金融海嘯，不論打工仔或老闆一樣咁灰，我發錢韓就覺得，喺呢啲黑暗時期，就更加要自強增值。其實坊間好多非牟利機構，都有舉辦課程或講座，畀在職或者待業嘅年輕人upgrade ，好似勞工處青年就業起點（葵芳），會喺11月22日舉行一個免費營商talk ，請嚟鴻福堂集團執行董事司徒永富先生分享營商之道。而另一個由循道衛理觀塘社會服務處神愛關懷中心主辦嘅「對人講人話之工作間相處的藝術」，則會喺11月18日請來一位MBTI （性格類型）認可治療師，佢會教吓打工仔喺職場上點樣同同事溝通之術，只係$30入場費。11月大家畀心機上talk ，逆境自強，共度時艱！
勞工處搞嘅「營商之道分享」，target 係畀18歲至29歲、想創業或剛創業的年輕人，只要打電話登記成為會員就可以免費參加，名額有50個。主講嘅司徒先生，唔只係鴻福堂集團執行董事，仲係樹仁大學副教授，無論營商同教學經驗一樣咁豐富，佢個talk 會教授年輕人創業貼士，點樣好好利用手上嘅資源，開源節流，令生意發展穩步上揚，發言人黃先生表示：「司徒先生大致會從心理方面喺手，遇逆境時心態上唔好慌晒手腳或者急功近利，反而要善用手頭嘅資金。」聽吓呢啲前輩意見，可以行少好多冤枉路。
知性格 易合作
另一個叫「對人講人話之工作間相處的藝術」嘅講座，就會以MBTI （Myers-Briggs Type Indicator ）呢種人格測檢法，幫一嘅打工仔同佢哋嘅同事溝通，簡單來講，MBTI 係一套性格測驗，認為人大致可分為十六種不同性格，透過了解自己同身邊同事員工嘅性格，大家就可以配合得更好，提高工作效率。舉例講A 君與下屬難以溝通，根據MBTI 的測試，A 君是ENTP （外向直覺帶思考知覺）型的人，而他的下屬是ISTP（內向感覺帶理智知覺）型的，A 君領導風格一向較有創造性和應對變化的特性，跟處事作風比較深思熟慮嘅下屬難以避免有分歧，上司知道下屬嘅性格，就要畀多嘅時間下屬消化指令，而下屬亦了解上司心急性格，繁文縟節就應該幫上司處理咗先，做事亦要快手嘅。發言人施小姐表示：「個talk 會請一位認可MBTI 治療師，教大家點樣使用呢套方法，從而了解自己性格，再學點樣同其他類型嘅人溝通，工作可以夾得更順暢。」家和萬事興，難關都易過嘅，呢個講座只需$30就聽足2粒鐘，比起一嘅私人機構所舉辦類似嘅講座，郁嘅就要畀成$300至$450一堂，十分一價錢，三草嘢就有嘢學，仲想點？
營商之道分享
主辦機構：勞工處青年就業起點（葵芳）
時間：11月22日（星期六）3pm-5pm
地址：葵芳新都會廣場二期9樓
名額：50至60名（未定）
費用：全免
查詢電話：31888070
對人講人話之工作間相處的藝術
主辦機構：循道衛理觀塘社會服務處神愛關懷中心
時間：11月18日（星期二）7:30pm-9:30pm
地址：觀塘翠屏
翠榕樓地下
名額：30名
費用：會員$10、非會員$30
查詢電話：27276036
PROFILE
發錢韓，本身姓韓，由於見錢眼開的性格，所以朋友均稱呼他發錢韓。百足咁多爪，平時鍾意四圍八，與不同行業人士吹水收風，了解香港商機走勢。
