51歲的鄭裕玲（嘟姐）日前宣布與46歲的呂方分手，16年情玩完，嘟姐接受訪問時仲好大方話因為二人生活作息唔同而分手，但亦有傳因為嘟姐拒婚，心死呂方撻著新女，所以飛起嘟姐。
據了解，來自單親家庭的嘟姐自細有陰影，所以唔肯結婚，而換膚執樣的新聞又唱到街知巷聞，加上她生活規律過軍人，愛夜蒲的呂方難免倍感壓力，連嘟姐密友都指嘟姐多怪癖又自我，試過錄影《一筆out 消》時響廠內無啦啦做瑜伽。呂方忍足16年先走，其實都算忍功一流！
呂方與嘟姐92年秘密拍拖，被踢爆後只肯以好友相稱，97年呂方將淺水灣道明慧園租出，並搬入嘟姐香閨同居，同居11年，呂方難搣煙癮，偏偏健康嘟嘟憎爆煙味，煙癮起時，呂方要走出露台食。
嘟姐宣布分手前，呂方早於月中遷出嘟嘟名下位於淺水灣、市值四千多萬的Manhattan Tower 愛巢，搬入月租僅1萬元的紅磡海韻軒服務住宅，重過單身生活。週日（26日），大批傳媒到海韻軒追訪呂方，但他粒聲唔出並找來經理人丘亞葵代發言。
深宵扯煙
嘟姐出名早睡早起，每晚11點前就準時訓覺，相反11點呂方都仲係劈緊第一round 咋！
一度甜蜜
嘟姐7、8歲時父母離異，與親弟媽媽相依，早對婚姻失去信心，她亦直認對金錢有強烈依賴感，變得精打細算，但據密友指嘟姐與呂方相處時，嘟姐卻有另一種溫柔，而潮州漢呂方亦有其大男人一面。
日啪21丸
傳聞二人分手是因為第三者，但據了解，第三者只是導火線，男方早難頂嘟姐怪行多多。
嘟姐五官常變，而且生活講究兼姿整，她的好友查小欣就曾踢爆嘟姐每星期洗腸之餘，更日食21粒「丸仔」，其中包括8粒洗腸丸及Menatolin （安眠藥）等，另一身邊密友更透露：「佢朝朝7、8點就起身做兩個鐘運動，鍾意有夜生活嘅呂方點會肯奉陪。嘟姐每樣嘢都要玩到好專，有段時間佢玩瑜伽，佢條癮起就連錄影入廠都要做。佢係怪啲，不過佢哋呂方好好，大家都盡量遷就對方！」密友又指出呂方和嘟嘟經濟一向獨立，「呂方除咗住嘟嘟屋企，佢使嘅都係自己錢；同嘟姐出去食飯，佢會主動埋單，而嘟姐亦好識做等佢出手，其實呂方好要面好大男人㗎！」呂方入行廿多年未計登台收入，早年單是物業投資賬面都賺了超過500萬，冇嘟姐亦唔使愁。
之不過亦有另一個版本，指嘟姐主持北京奧運後返港性情突變，令呂方倍感惡頂。記者曾致電嘟姐助手求證，她引述嘟姐說「拒絕回應」。
脹卜卜
多年來好食好住，凸腩呂方分手即時搬入月租1萬元的紅磡海韻軒，又積極約經理人丘亞葵洽商出碟搏命撲水，丘指呂方正籌備內地巡迴個唱。
女機械人
出名要求高的嘟姐除咗不斷「改進」靚樣外，日常生活亦相當講究，除咗早睡早起狂做運動，就連飲食嘟姐亦要求嚴格，對生活習慣相當隨意的呂方絕對是難頂！
一早食
嘟姐一向奉行少肉主義，佢曾堅持兩個月日食一餐，坐圍成功由39吋減至34吋，禁甜又主食高纖食物配合每週洗腸，方便排便及身體排毒。
狂運動
據知嘟姐每日7點就會出車到菲力偉包gym 房做運動。
多食菜
00年，嘟姐做《男親女愛》舞台劇時，午餐以去皮雞肉清菜沙律為主。
準時訓
除非有工作在身，每晚11點前嘟姐就會上床訓覺。
