順我者生、逆我者亡。呢句說話，真係放諸任何一行都啱使。就講早期曾經嚟過香港嘅名模Liz 楊俐思，曾經同Amanda S.、Ana R.、Lisa S.等一眾「鬼模」拍過檔而打響名堂。呢個擁有32D 身材嘅巴拉圭混血名模，後期因為簽咗台灣嘅「微風2館」，於是去咗台灣搵食，之後更因同陶喆傳出緋聞而走紅。不過聽講佢最近頻頻俾廣告商要求換人嘅消息。咦，乜咁大劑？
媽咪姐收到台灣友報料，話根本就冇廣告商要求換人，主要係Liz 唔俾面、三番四次推卻「微風」同佢安排嘅飯局。Liz 更聲明自己係模特兒唔係「陪客」。本來「微風」對佢唔聽話已經一肚火，再加上佢呢番說話，有損公司形象，於是一怒下完全唔同佢接job 兼將Liz 手上廣告全部換晒人。
實情係點，外人真係好難判斷，不過合作嘅嘢，合則來不合則去，使乜搞咁多嘢呢！
Liz 初出道時嚟過香港，當時仲做過何潤東新歌MV 嘅女主角。《台灣蘋果日報》圖片
上個禮拜六，俾人見到Liz （右）向另一名模李琇雯（左）訴苦俾「微風」玩嘅「慘事」。仲邊講邊喊晒，真係見者心酸。《台灣壹週刊》圖片
