呢排興日系手機，搞到好多friend 都叫電機兒幫佢哋留意有冇筍機，反正長期都響先達蒲，幫佢哋睇吓又有乜所謂？不過，日日行筍機就唔多覺，反而俾我搵到一堆疑似日系機，睇真啲原來係大陸出嘅DCooMo 同SiftBank ，抄名抄款但抄唔到人哋嘅高科技！
而先達更有鋪將呢堆「超自然假機」放出門口賣，唔想中招買錯假機就要我電機兒加神探伽利略出手喇！
老翻達人Sony ×Panasonic
齋睇外表的話，呢堆老翻機同正印真係有9成似，當中以呢一部DCooMo T900i 扮DoCoMo 部P905i 最神似。單係機身大細同埋扭芒功能就已經抄足，Panasonic 睇到都唔知好嬲定好笑。之不過，電機兒拎住兩部機研究咗一陣，都發現破綻嘅。好似T900i 機身側邊雖然都有掣，但就唔似P905i 一按識彈芒咁型！最騎呢就係仲硬加埋Sony VAIO 手提電腦個嘜頭落去，惡搞Sony ×Panasonic ，完全貫徹老翻機傳統，欽敬！
老翻有得睇電視
睇完DoCoMo 被翻之後，又點少得SoftBank ？電機兒第一眼見到呢部TV9打正SiftBank 標誌，都誤以為佢係SoftBank 部923SH ！不過，呢部機最巴閉唔係個樣，而係佢唔似正牌日系機，要靠Hyper SIM 先有得玩拍攝同聽歌功能之餘，更連正牌機響香港一定玩唔到嘅睇電視功能佢都搞掂！當然，你咪以為部老翻TV9可以睇到日本電視台咁勁啦！其實，佢只係可以睇番TVB 等4個本地頻道而已。行出街拍埋啲行貨SX862，人哋睇FoneTV ，你睇《少年四大名捕》都真係吹脹！
終極crossover ︰iPhone ×Nokia N95
上面咁多惡搞crossover ，咁啱Nokia 同iPhone 又都係老翻機至愛，所以就有大陸機好有「創意」咁將N95同iPhone 炒埋一碟。不過，電機兒玩落都覺得佢外形同功能都係得啖笑，用幾用仲會hang 機添！
電機兒
見盡奸商、騙徒，恃住有幕後高人力撐，唔怕得罪人，有嗰句講嗰句！
日本人認日本機，等我神探伽俐略話你知呢堆機有乜蠱惑。
T900i 仲有埋輕觸式面板，不過試過唔覺有反應，都係要用下面方向掣先操作到，假！
機背鏡頭竟然吹水話有800萬像素，擺明搵笨，其實只係得200萬像素，咪信！
抄Panasonic 機款，但印疑似VAIO 標誌，真係當人係白痴！
