年屆51的鄭裕玲（嘟嘟），一直奉行果酸換膚，耐唔耐就好似條蛇咁脫皮換過副披，自覺人都靚啲。有傳嘟嘟為求皮膚嬌嫩，換膚換上癮搞到嚴重甩皮。
嘟姐換膚傳通街，其御用化妝師Felix Ferreira 竟無辜成箭靶，據知嘟姐不但唔聽Felix 勸告，又信晒身邊姊妹團加鹽加醋而疏遠對方。家陣好友化妝師蟬過別枝食大茶飯，唔信人嘟姐「畫皮」就要一腳踢，佢咁奄尖，都幾難搵另一個化妝師接手㗎！
鄭裕玲為keep 住上鏡靚，早已迷上果酸換膚，據知情人士透露：「嘟姐響80年代已經用果酸換膚，用完之後啲皮膚初時都好似BB 咁又白又滑，佢用到家陣上晒癮，幾乎個個星期都用一次，所以你咪成日見到佢甩晒皮囉！」
冇再合作
上週三，當了嘟嘟10年御用化妝師的Felix 與其跟Covermark 合作搞化妝學校的5位高足跟本刊做訪問，其間向Felix 查詢有關嘟嘟換膚一事，點知Felix 就同本刊記者講冇同嘟嘟合作好耐！Felix 更承認有人勁打毒針搞到兩人關係不如前。
F ：《FACE 》 X ：Felix
F ：聽講嘟嘟好鍾意用果酸換膚？
X ：係呀，佢大約一星期換一次㗎！
F ：咁密唔怕傷皮膚咩？
X ：梗係傷啦！有叫過唔好用得咁密！佢用到塊面傷晒，但你話佢聽唔聽啊！
F ：幾時開始冇同嘟姐合作？
X ：舊年底已經開始減少！
姊妹狂插
F ：聽講嘟姐身邊有人唔妥你？
X ：佢身邊太多人同佢講嘢啦，嘟姐身邊啲人成日話我同記者放料話佢整容，真係冤枉喎，我同嘟姐講過，邊個話我放料嘅，叫佢企出嚟，我即刻摑佢兩巴，睇吓佢仲有乜嘢講！
Felix 強調自己並沒有埋怨嘟姐：「佢警戒心太重啦，其實邊有人爆佢料啫，我同佢解釋過都唔信我，好多朋友都叫我唔好再受佢氣，化得唔好，啲人仲以為我手勢差呀！咁我而家幫Covermark 搞project 都好開心啫！」家陣嘟姐出騷要自己落手落腳化，鬧走人，咪辛苦自己囉！
好姊妹毒針團
於97年因《男親女愛》舞台劇合作後，嘟嘟開始mark 實化妝師Felix ，每次搵Felix 化妝費要成1萬蚊，開價貴不過嘟嘟一樣用足10年冇say no ，但因去年有雜誌指嘟嘟整容，據知嘟嘟身邊麻雀密友如朱慧珊、查小欣等即時向嘟嘟打小報告話懷疑Felix 放料，而另一姊妹寇鴻萍仲介紹嘟姐用自己品牌護膚品，個個唔認自己有份離間，呢單嘢審死官喎！
以上全屬真實對白
極速埋新堆
冇咗嘟姐，Felix 好快就埋咗化妝品牌Covermark 堆，最近，Covermark 搵埋Felix 組成一隊化妝team ，為明星免費化妝，Felix 說：「呢班係我嘅徒弟，Covermark 就搵我哋搞個明星化妝team ，咁我就搵咗10個徒弟出嚟做呢個project ！其實而家呢個年代男女化妝師都一樣好專業，唔使怕咩醜！同埋而家太多化妝師係跟化妝學校出嚟，學壞師，啲手勢好差！」係囉，有實力你慌冇嘢撈咩！
化學灼傷
果酸（Alpha Hydroxyl Acid ）換膚成效如何？據皮膚專科醫生史泰祖話亂用好危險：「果酸作用係去除老化角質層，促進新皮膚生長，最好由專業皮膚醫生主理，市面亦有果酸產品出售，不過唔建議自己響屋企用，分量應由醫生署方，長期不恰當使用會令皮膚變薄、傷及組織，令皮膚變紅，造成化學灼傷，手尾會仲長。」
救星走人，鄭裕玲惟有自己化，上月公益金騷時，即使與前化妝師Felix 同場，Felix 都冇幫佢執靚個樣，Felix 話：「佢自己化都ok 嘅，跟咗我咁耐，都學到啲嘢嘅！」
有新老細︰去年底同嘟嘟反面，Felix （左）即時透過友人認識霍建寧好友Irene A（右），在其穿針引線下認識和黃大班霍建寧，現主力化霍建寧家人及其好友，有錢人又nice 又畀得起錢，傻都知埋邊個堆好啦！
見光死︰素顏嚇死人，嘟姐向來出街好小心，早前同助手行時代廣場時一見有記者拍照，佢即時叫助手趕記者及以手遮面，以免真面目示人。
Felix ︰企出嚟畀我摑兩巴！
