CG免費報章雜誌網每次股海「大時代」都有若干教訓值得普羅散戶記取，這一次金融海嘯，令全球資金市場出現嚴重的信心危機，雖然市場上總會有人倖免於難，投資上無乜損傷，但霎時間四周圍身邊人對任何事物都無晒信心，即使有錢想投資，都因無信心，唔會有行動。
全球不少先進國家為保民眾對銀行之信心，紛紛將存款保障金額達致百分百全保，連台灣都「拍心口」提供全額保障，反觀香港仲係播緊存戶保障上限10萬銀個「洗大餅」電視廣告，仲話畀你10萬個信心！
股價重返03年水平
講真，無人睇小10萬蚊，但亦無人信香港做唔到全額保障！既然做得到，點解唔做呢？際此風雲色變，存戶保障上限10萬元呢個措施值得當局檢討。
本地銀行股近期走勢真係麻麻，近憂之一係唔知分銷銀行回購雷曼迷你債券方案最終會點搞，實際要賠幾多出街，其中有券商認為潛在風險最高的中銀香港（2388），股價一洩如注，家陣剩得11元，與大半年前股價徘徊約20元相較，累計已跌達45%，股價亦已重返03年下旬時水平。
中銀投資價值已開始浮現，後市如再見大插，可考慮低吸放入保險箱作中長線持有。
方星俠
