上周五（9月26日），《飛輪海想入飛飛世界巡迴演唱會》一連兩場香港站喺機場博覽館舉行。第一次喺香港開演唱會嘅「飛輪海」，當然好識做，又露肉又玩雜耍，交足功課。
四子都出盡法寶冧女，不過最受歡迎嘅吳尊始終拋離其他隊員成條街，無論唱緊歌定係做緊訪問，吳尊都有本事冧到班女fans 喪叫喪喊，佢仲出動埋型仔老竇幫手。難怪成日傳出吳尊要單飛發展嘅消息啦，講真佢單拖都夠殺喎！
吳尊初出道怕影響健康形象，都會遮住右手手臂嘅紋身，後來知道fans 好受落，所以今次演唱會，佢一於大騷粗壯手臂嚟冧女。
騷肌肉
飛輪海四子齊齊著住盔甲衫表演雙節棍，雖然大家套衫係一樣，但手瓜起
嘅吳尊(左一)，比起身材瘦削嘅汪東城(左二)同辰亦儒(右)，始終都係吸引啲。
趁機博懵
到握手時間，四子走去觀眾席，女fans 即伸手瘋狂抓住吳尊，仲有人趁混亂對吳尊上下其手，搞到佢避都避唔切，個樣幾咁狼孭。
散場送飛吻
飛輪海四子Encore 後齊向fans 獻飛吻，識講幾句廣東話嘅吳尊，仲一邊飛吻一邊話：「我好唔捨得你哋呀！」
Say hi
吳尊為咗冧fans 真係無所不用其極，你睇其餘三子唱緊歌，佢就掛住同啲fans 揮手。
中日fans
專程嚟捧吳尊場嘅fans ，除咗香港嘅陀地fans 外，仲有著晒和服嚟支持嘅㗎妹。
O 嘴
到汪東城(左一)彈電結他伴奏，辰亦儒、炎亞倫負責唱歌，吳尊又顧住O 晒嘴嚟電fans ，死未！
籮肌出擊
上周日（9月28日），吳尊單拖出席擔正嘅電影《梁祝》宣傳，著住條勁窄西褲嘅佢，示範舞劍時
晒馬，竟不經意現出結實籮肌，令在場女fans 不停尖叫，呢啲咪叫引死人囉！
吳尊嘅魅力唔單止殺死fans ，就連電視台女主持一樣唔放過，你睇佢同美亞電影台個女主持合照時，個女主持笑得幾冧。仲有，吳尊用一張紙巾仔，都可以同fans 玩（左下圖），呢招扮可愛真係高。
尊爸都發功
其實唔單止吳尊識做，連佢老竇都好識冧女，專程由汶萊嚟捧個仔場嘅尊爸，仲幫fans 舉牌。(左下圖)
勁親民嘅尊爸，除咗俾傳媒任影唔嬲，就連呢個㗎妹fans 要求合照，一樣冇托手踭。(右下圖)
