Tod's Pashmy Dream 派對
超級大牌趁時裝周開P ，例必人頭湧湧，身為皮具老大之一的Tod's ，次次落足本搞大型event ，今次有乜新搞作？之唔係搵當紅女星桂莉芙柏德露和名導Dennis Hopper ，拍名為《Pashmy dream 》網上宣傳短片囉，仲要搞埋首映，兼大排筵席設black tie 豪門夜宴，先至係戲肉所在，隨後再來酒水任飲的after party ，唔使錢又飲又食，係人都俾面出席啦！
Roberto Cavalli 出Coke Light
米蘭超級大牌通常落重本搞騷，show 前附設bar area 無限酒水奉客，一啲都唔奇。不過，愛玩嘢的Roberto Cavalli 卻不甘平凡，索性埋可口可樂堆玩crossover ，推出限量版Coke Light ，仲要響騷前騷後以及群星拱照的派對，以可樂代酒，成功搶鏡，搞到有份到場睇騷的一眾時裝友，不顧儀態湧去搶可樂樽，都算搞笑！
PRADA 女模執生事件
PRADA 被稱作時裝先鋒，開騷當然萬眾期待，新衫固然煞食，但今勻點都唔夠身為配菜的高踭鞋來得精采，事關繆小姐將幾乎7吋的高踭鞋玩styling 襯船襪，睇頭十足，仲要俾我坐到front row ，近距離睇住女模標晒眼水行catwalk ，最後女模Katie Fogarty 失平衡仆倒，惟有扮鎮靜挽鞋返入後台，真係一步一驚心。足證模特兒生涯一樣有血有淚，實在令人欽佩！欽佩！
Frida Giannini 攬仔
Gucci 主帥Frida Giannini 出咗名怕醜，每次開騷謝幕一臉含羞答答，不過今勻一改以往作風，竟然趁謝幕時間到台前公然攬仔，場內人即時議論紛紛，經明查暗訪之下，神秘男原來是Gucci 即將離任的CEO Mark Lee ，又係嘅！臨別秋波，來個獻吻兼big hug 先夠肉緊嘛！真係羨慕死隔籬呀。
IM'Isola Marras 花園showroom
AntonioMarras 的騷一向有收視保證，不過今次妹仔大過主人婆，主線反被second label搶盡風頭，當收到通知，其副線IM'Isola Marras 搞第二季presentation ，初時抱住姑且一去的心態踩場，點知驚為天人，一入門口先是小型雅致花園加體貼lunch box 侍候，再嚟儼如置身小公主寢室佈置的showroom ，睇頭比主線有過之而無不及，最緊要係親民又生鬼的Antonio Marras 到場現身說法嘛。
Dolce &Gabbana 星光熠熠
去得米蘭時裝周，一定恨去Dolce &Gabbana 的騷，不過撲飛真係難過登天，預咗冇得入，惟有死守門口，務求標尾會博到入場。等等吓竟然俾我捕到名人潮星如李冰冰、九十年代超模Naomi Campbell 等魚貫入場，仲有時裝潮人一大堆，不過代價係前後企咗3個鐘囉！
有幸獲邀出席米蘭時裝周的亞洲紅星唔多，李冰冰係中籤人物之一。
Gianfranco Ferre 新帥
正所謂一代新人勝舊人，每季梗有時裝品牌改朝換代，07年自Gianfranco Ferre 仙遊，急急搵來前Nina Ricci 主帥Lars Nilsson 上陣，但未正式亮相公佈上任，已遭再次換角，搵來行孖咇的Tommaso Aquilano 和Roberto Rimondi 接捧，第一季交出的成績單，氣質似足天使下凡，睇到在場人士個個拍爛手掌，咁「掂」，唔知會否成為繼Dolce &Gabbana 之後另一pair 神話呢？
走馬上任的Tommaso Aquilano 和Roberto Rimondi ，一出場即獲如雷貫耳的掌聲。
Sergio Rossi x Puma
時裝周行程緊密，不時要靠「攝」時間拜訪各大showroom ，今季Sergio Rossi 借40周年之名，跟一向鍾意搞crossover 的Puma 合作，推出別注波鞋，梗係要俾面撐場。另闢一角的Sergio Rossi x Puma 系列，將波鞋變身高踭鞋，但不失sporty 味道，睇到我口水直流。
美版《Vogue 》總編輯Anna Wintour 也俾面出席。
短片主角桂莉芙柏德露，當然係全場焦點，難怪無論晚宴還是after party ，全城名人時裝友都湧住去。
以經典豹紋、黑白虎紋幫可樂樽身改頭換面。
