老一輩戲迷相信十之八九一定有睇過《科學怪人》，呢套被稱為「恐怖片」始祖嘅電影，係有「科幻小說之母」之稱嘅Mary Shelley 傑作。而《科》由1931年開始到2004年，先後改編成電影搬上銀幕不下數十部，直到今時今日，講起鬼怪恐怖片，《科》依然為人津津樂道。嚟緊響國際台播映嘅迷你劇集《科學怪人之異種驚變》（Frankenstein ），絕對唔係舊嘢，而係BBC 電視台響07年拍成嘅。嘩，「萬聖節」就快到，《科學怪人》真係嚟得及時。
播映日期：10月6日逢周一晚9:00pm 國際台
英國BBC 電視台改編翻拍嘅《科學怪人》，同以往冇乜大不同，科學家Victoria （Helen McCrory ）要將一堆死人「拆件」組合，要其重新「復活」。本來上司意思只要令到「怪物」識「心跳」就OK ，但響製作過程期間，Victoria 響自私心作祟下，竟然偷偷將死咗嘅仔DNA 注射入「怪物」度。經過反覆試驗，「怪物」終於成「人」。
本來「怪人」雖然係不似人形，但心地善良，而且「怪人」體入面有佢個仔嘅基因，所以Victoria 對「怪人」產生咗「母子情意結」。可惜「怪人」因為樣貌奇醜無比受到排擠而令其性格大變。後果係點？咁就留番大家自己去追啦！
總之一句講晒：萬聖節就算唔出去wet ，響屋企睇令人毛骨聳然嘅《科學怪人之異種驚變》，包保一樣夠晒刺激。
科學怪人其實係瘋狂科學家為圓自己「心願」而製造出來嘅可憐產物。
響劇集入面好難睇清「怪人」全相，惟有將其斬件逐忽「捉」。
眼
腳
