今時今日旺角通街都係cap 帽金毛bling bling 大眼仔。同一個女神打扮，如果taste 都差唔多呢，William （陳偉霆）真係可以變身王子，以後改口叫佢霆霆，有機成為Generation X 誰輕輕叫喚我Sky King 。
可惜，「懶靚仔，over 咗啦！」、「妖，好扮唔扮，把聲都扮埋MJ ！」你班港仔港女，見到韓國阿Rain 個心口跳吓彈吓就尖叫、見到台灣小豬又嗌人亞洲舞王，登入香港討論區就長他人志氣咁反骨？
攝影師為人民服務，一邊影相一邊嗌：「拉開啲件恤衫，拉開啲呀！」
「Mani 鬧呀，話唔好再露喇。
「我知，未接受會話：『嘩，做咩呀，扮嘢呀？』但係跳舞要有感染力，你有冇見過有人跳勁舞時個表情怕怕醜醜？我都擔心觀眾唔鍾意，解決方法係我落到台盡量再nice 啲。
「我成日覺得自己係Sun Boyz 最樣衰嘅，因為Steven 鬼鬼哋公認靚仔、Dennis 又似金城武，所以我拍埋佢哋度好冇自信。
「係，我係學MJ ，〈Taxi 〉我特登有三個動作完全學佢，唔想人唔記得MJ ，身為舞者要宣揚MJ 精神。」
精神？喺Neverland 玩小朋友佢就精神。「我唔信㗎，佢有愛心啫……」
唔計張如城，好耐冇見跳舞男歌手咯，22歲仔滿腔熱誠勁歌熱舞，扮型只不過係工作一部分啫。我哋係咪誤解咗佢？
兄弟
Boyz 這組合，像拔尖計劃，先有Kenny 被拔走，再來William 畢業，沾沾自喜梗有。「過關？絕對係咁嘅感覺。好老實講，真正屬於自己嘅character 而家先算正式起步。初初入Sun Boyz ，Mani 都同我哋三個講，呢個係好好嘅踏腳石，之後變成點就靠自己。好開心，因為由細到大我都係想做一個跳舞歌手，我參加新秀都係為咗呢一樣嘢，終於有機會做到。」有冇擔心隔籬嗰位留級再留級生Steven ？「Mani 話我聽會獨立發展，我一直都唔知點同佢哋講。其實佢哋兩個應該好快收到風，但係為表尊重，點都要自己同番佢兩兄弟講。掙扎咗好耐，唔知點樣開口，最後，終於有次坐緊車時開口，Dennis 第一個反應：『
，我一早知啦！』Steven 就話：『我哋都就嚟有戲拍啦！』聽到佢哋咁講，個感覺好舒服，大家兄弟心照啦！」以前讀書隔籬位四眼仔俾阿sir 揀去參加數學比賽，我都即刻話好彩啫留番啲時間打波好過啦，「佢哋而家主力拍電影，其實……佢哋本身都鍾意喺電影方面發展，而我就鍾意舞台，希望各自走到屬於自己嘅一條路出嚟。」如果嗰陣四眼仔咁同我講，我諗我會告畀班主任聽，佢蝦我。
「係初初唔慣，以前有人傍住有人依賴，不過之後過咗美國學舞兩個月，嗰度一個華人都冇，由頭到尾都係自己一個，唔只學跳舞，仲學識獨立，開始習慣焦點淨係集中喺自己身上，仲慢慢開始享受呢種感覺。」
22歲學識獨立，好幸福的一個家啊，「我daddy 喺我好細個嗰時過咗身，我同媽咪、哥哥家姐住，而家哥哥家姐結咗婚，不過都住得好近，大家都好close 。我唔會自己搬出嚟住㗎，我想同媽咪住，因為媽咪冇伴，做細仔梗係陪媽咪！」
媽咪媽咪，我記得兩年前訪問剛組成的Sun Boyz 時，形容William 為名校插班生，在九龍聖若瑟中五畢業，我仲知道呢位咁乖嘅小朋友家住九龍塘名校網和城臺豪宅添，點解我知？因為我哋曾經影到Angelababy 女神真身到此一遊，睇碟放狗。
女神
「新碟有首〈千萬少年〉，我搵咗阿Angelababy 做我女主角，首歌歌詞我好鍾意，講每個年輕人都想有5千萬送畀女朋友，對女朋友有承諾。」
寓工作於冧女，我係女神的話，即刻搵你做聖鬥士。
朋友啊嘛？「而家冇拍拖，我想人哋focus 我嘅事業，好驚緋聞，所以做咩都好低調。」今年已經齊齊行過泳衣騷、出過Playstation 活動，近排仲打孖著佐丹奴影靚相，「傳得好咪冇所謂囉，作得太犀利又有負面影響就唔好喇，所以我好多謝傳媒，對我哋好好。情侶檔做嘢某程度上係好事，但唔希望呢樣係宣傳工具。
「呢一刻我真係唔諗拍拖住，老闆楊生（楊受成）教我，你呢一刻用9成時間做嘢、1成時間諗其他嘢，咁你第時就可以有9成時間諗愛情，淨係用1成時間做嘢。老闆都話覺得我做得幾好，再三叮囑我，所以我成日都記住喺個心。」咁醒，將楊老闆放喺心入面，剛出完碟的William 又再忙著錄新歌，預備明年3月再出新碟。
同女神識於微時，「識咗好多年，以前casting 已經見過，跟住做迪士尼節目主持，我諗都有4、5年。」咁班電車仔使唔使羨慕你？「發展機會……其實有嘅，但係我會保留住呢個機會先啦。」你保留啫，咁阿女神唔留畀你點算？「咁……我諗佢都係保留緊嘅。」妖。講完呢兩句，佢自己都忍唔住笑。啱嘅，唔認唔認，可能仲好世界！
舞者
William用舞者呢兩個字形容自己，好勇猛。舞者之路由15歲開始，唔係因為骨格精奇，係因為媽咪。「15歲開始已經學跳舞，我媽咪鍾意MJ 同郭富城。其實我阿媽都跳舞㗎，佢會落D 跳舞，好型呀呵？所以由細到大都吸收呢啲嘢，我16歲就自己學識Moonwalk 。」15歲參加跳舞比賽贏得Rico Chio （曾為張國榮演唱會排舞）的免費舞蹈課程，學足幾年，之後喺學校做舞蹈學會會長，再參加新秀嗱埋冠軍，已經好鬼有信心。「係呀，直到去美國學舞之前都好有信心。去到仲諗住自己有跳舞底，唔報初班報中班，同Janet Jackson 啲dancers 一齊上堂。嗰度個個跳得好勁，又得我一個華人，可能因為咁成日俾老師捉出去一個人跳，自己跳到就話啫，又跟唔到喎，所以好樣衰，有一次返到motel 度喊咗出嚟，猛問自己點解成日話自己跳舞叻，但係俾人捉出嚟又跳唔到。好彩motel 度有好多鏡，晚晚返到去就不停練番嗰日教嘅嘢，兩三個禮拜後就跟得番進度。」
返到香港，修行未完，「跳舞身形唔可以走樣，做健身又一定要on diet ，我而家夜晚戒埋唔食晚飯，朝早淨係食蛋。」
，日日食晏我都兩隻太陽蛋唔該㗎啦，「一日8隻，淨係可以烚。」咁食法會唔會生腎石㗎？
咁辛苦為咩呢？孱仔強洪卓立都獨立出碟喎，「我成日幻想以跳舞歌手嘅身份跳上頒獎台度。要我揀，我揀鍾意跳舞多過唱歌。」
喂，咁去做dancer 啦！講笑啫唔好嬲，今年邊個男新人同你爭？「真係好似冇乜，呀，公司有一個，扈佳榮（去年英皇新秀第4名）。」穩過南華嗱聯賽冠軍啦！
Dangerous
扮MJ ，本來叫佢做MJ 成名動作傾斜45度，「做唔到，佢個舞台有機關，會伸口釘出嚟扣住對鞋㗎，我喺佢其中一個concert 度睇到。」
唔只，MJ 大把假嘢，假眼假鼻連膚色都由黑漂到白。「我覺得佢整完第一次時最靚仔。
「好似話而家個鼻整番好喇喎。
「嚟緊又話有新歌出喎。
「最鍾意〈Dangerous 〉，我新秀面試都係跳呢首歌。」
William 真係好迷MJ 。
本地男歌手，都曾經有唔少扮過佢，杜德偉〈影子舞〉、張立基〈Electric Girl 〉。
模仿對象愈受歡迎，愈多人企出嚟狠插。
真係dangerous 。
話時話，點解Dancing King 郭富城唔扮MJ ？係咪因為唔夠高？
開始習慣焦點淨係集中喺自己身上，仲慢慢開始享受呢種感覺。
邊位同學想自己出嚟表演呀？威廉同學舉手。Sun Boyz 組成兩年，分拆出William ，剩番Steven 同Dennis 未有著落。《蘋果日報》圖片
去沙灘玩水玩到露半股，其實有市場啊，「上頭下令唔俾再露咁多。」所以今次輯相一點不露。
