Miuccia 不諱言唔愛做商業市場的一分子，承蒙各人俾面，Prada 金漆寶號就似一本通行無阻的passport ，隨時可以大踏步心口掛個勇字做前衞敢死隊。
PRADA 回歸親民
擅長布料實驗，新作賣點是將棉質混合鐵線，造成皺紋視效，乾淨輪廓配襯bra top中空裝，高貴性感五五分賬。色澤由栗子啡到淡粉紅到酒紅印花，另有手繪海洋生物印圖，雜而不亂；對比上兩季，09春夏明顯易著出街得多。
特別一提高踭鞋履，高度令貓行女模頻頻拗柴，但色彩運用及外形非常吸引，靚的代價不可謂不大。
Fendi 烈而不辣
老佛爺筆下的奢華，落墨在Fendi ，特徵是充滿陣陣科幻味。上期玩過陰森樹林，由大自然借題發揮，將24K 金混mink 雙打，富貴逼人。新作轉
經營物料科技，尼龍可以超輕透薄，真絲柯根紗壓褶任屈唔易皺/ 雷射壓極細緻通窿花……強調立體輪廓，弧形線條鋪排有序，領口前襟有立體摺褶，善用複雜手工細節塑造不過於舞台化設計。鎮牌套現手袋系列重回正正經經路線，擺明同你講實際的一季；整體告別過往嗱彩霸氣。
Versace 另類甜心
人會變月會圓，勢估唔到曾經是女人湯丸男人冰淇淋的Versace ，女大十八變。紅極80年代經歷有上有落，東山再起並無靠搵當紅壯丁做翻新工程要員，不求人自行全面迎入回春軌道。新季整體主打cocktail dress ，過分硬銷肉光性感已經過時，以厚棉及柯根紗孖住上營造出鱷魚皮及蛇皮紋理嗱分，減低堅貨天價位。菜單當中，晚裝珠片短裙以外，小情小趣在利用拉鏈屈成心形圖案，突然俏皮可愛，實屬品牌罕見之舉。
GUCCI 非常夏日
時裝大帝在台上覓理想，大致可分為兩大幫派：有些令世人瞳孔張開，純粹造勢；有些擺到明件件著得出街見得人。今日Gucci 掌櫃Frida Giannini 明顯是後者，強項穩打穩紮以商業掛牌。09春夏繼續落力傾售度假色彩，刻意借反光膠板製造海水倒影，系列一貫滲入三毫子搖滾及靠攏Tom boy 台型，biker jacket / 巴拿馬草帽襯西裝恤衫收腳褲/ 改良獵裝，不同調藍色為本珊瑚橙橄欖杏為副，另備大量印花條子雪紡左右輪住跌膊連身裙/ 拖地晚裝，線條勾勒出非常夏日，唔整古做怪嗰隻。
MARNI 大包圍通殺
時裝人是貪心動物。
以小婦人形象起家的Marni ，春夏狀態回勇水準超班，百足咁多爪項目層出不窮向多元化發展。菱格水彩畫顏色圖案線條波點花花格仔條子，打亂章隨意抽樣組合，其次銳意開拓配件市場，大抽大抽頸鏈手
手袋高踭鞋，只此一件，包無重重複複你襯完到我搭番踩上台板，精品花多眼亂，顧得睇衫顧唔切睇鞋，仲未計其他單拖雜項呀。奉勸粉絲，小心。
Gianfranco 眾望所歸
冷手執個熱煎堆，時好時壞。有眼你見的Lars Nilsson ，以為飲得杯落，點知處女號未正式落水已反艇。經過一季重整軍心，最新找來孖人組合Tommaso Aquilano及Roberto Rimondi 走馬上任成為Ferre 創作總監，首張成績單，評價不俗。論輪廓論手藝論鋪序，章法老練唔會過於嫩口，保持品牌註冊建築結構美，頗有前人風範。系列主打立體剪裁，左右前後有不同款式有辣有唔辣。破格在物料混入魚絲編織，富彈性免漿熨唔易褶皺。完整夠台型，順利過關。
BURBERRY PRORSUM 烈女從良
儘管有英倫皇家御准百年橫樑壓頂，Christopher Bailey 的創作可以冧得掂的不止粉絲，仲有，睇數簿的一班老闆。
經過幾季唔打得都睇得的女聖鬥士裝束後，主帥筆鋒一轉，勒令女模從良；遮眼遮鼻披口patchwork 漁夫帽下，衣衫線條一律放寬行事，品牌命根乾濕褸，變得輕軟飄逸，運用淡淡扎染，配襯薄長針織及皺布視效，加上粉調色譜，逼埋身撩交打辣味消失，論創意無往績咁「掯」咁有睇頭，但肯定百分百商業討好。
遠看親民近睇布料視效有特色，是繆小姐近年最易carry 的一季。
最得筆者歡心是送客呢套金色縐布裙，簡而清線條又充滿張力。
[
本帖最後由canle 於2008-10-813:43編輯]
