大批暑假上映過的荷李活大片，排住隊在這個時候推出DVD 和BD ，本星期就輪到唔知叫佢英雄好，還是逃犯好的綠色巨人《新變形俠醫》DVD 。鍾意睇CG 睇特技的，忘記舊時李安那套，今集一定合乎心水；雖然巨人咆哮次數仲多過《魔幻王國》隻阿斯蘭，仲有生吞USB 手指和條褲一定唔爛，確實好笑。
記者︰陸俊雄
攝影︰陳盛臣
變完身例排大叫 成套戲歸根究柢綠色巨人的出現，都係美國軍方唔好，希望製造強化人出來。睇主角Bruce 手腳同個頭變大變綠變巨肌係幾過癮，但要充份表達因伽瑪射線而帶來的不受控力量，公式一定係雙手握拳，仰天長吼。不過呢招獅吼功純粹有姿勢冇實際，出場動作罷了。
講到真打，有3場大戰不容錯過的。首先是巴西工場內，Bruce 好唔情願情況下變了身，美國軍方派精英部隊射極麻醉針，都如蚊叮一樣。在夜視鏡下，綠色環境中出現綠色巨人襯到絕。另一場是大學校園激戰，軍方連音波功都出埋，巨人仲一腳伸到奸角布朗斯基九丈遠，心都涼埋。第三是最尾兩隻巨人大戰，撕開警車當武器、星雲鎖鏈乜都出齊，亦離不開美國英雄漫畫的邪不能勝正。
■奸角果然樣衰好多。
■仲唔係筋肉擂台？
■主角打勝仗當然做番個招牌咆哮。
■布朗斯基火箭炮都接得住。
間中加插笑位
■伸呢一腳，看得觀眾最心涼。
除了睇打戲，偶爾都有些輕鬆搞笑位出現。首推當然係男女主角的準床上戲，神女有心，可惜Bruce 一句不能太刺激令親熱戲告終。無辦法，Bruce 一激動心跳加速就會變身，「做不得」好合情理。
不過另有幾場戲卻好笑得來不合情理，例如Bruce 在圖書館內生吞USB 手指，咁都過到骨？還有他在市集中買肥人穿的超大碼彈力褲，總算向觀眾表白過，導演也曾諗過變極身條褲都爆唔爛的謎思。
■準床上戲最激係得咁多。
■要買加大碼褲，導演有做過嘢。
必睇Making of
雙碟版睇漫畫 《新變形俠醫》都係照例出了單雙碟兩版本，多一隻碟都是「Making of 」，但這次確係唔睇好過睇。因為CG 位多，例如在街上兩巨人大戰的一場，成街市民亂跑亂撞，拍攝時就真係一班臨記幻想被人追殺扮恐慌罷了。反而有個收錄原裝漫畫的環節值得一睇，如解構雨中山洞那一幕，大致忠於漫畫而來，沒有看慣美國漫畫的，更值一看。
■所說的一幕山洞戲，雙碟版中有用漫畫播番出來。
■雙碟版中，原來有另一個Opening ，係講Bruce 想自殺。
《新變形俠醫》雙碟版，售價︰$128
《新變形俠醫》單碟版，售價︰$99
