蘋果日報第20080928期~Avril 夫妻檔澳門賭場搶錢
加拿大搖滾小天后Avril Lavigne 前晚施展渾身解數，rock 爆威尼斯人。
安哥時，Avril 老公Deryck （圖）都上台演出，掀起全晚高潮。
久未露面嘅森森前晚都有捧場。
【澳門直擊】加拿大搖滾小天后Avril Lavigne ，前晚喺澳門威尼斯人開騷，雖然入座率只有六成，而且只唱咗70分鐘，但歌迷反應依然熱烈。Avril 不但即興打鼓同彈鋼琴，更請埋band 友老公Deryck Whibley 夫妻檔同台演出。
前晚Avril 嘅演出雖然唔算好爆，但係樂迷勁high ，場內紀念品一早被搶購一空。Avril 出場即唱出大熱之作《Girlfriend 》，嚟過香港幾次嘅佢，不時用廣東話講「大家好」及「多謝」同fans 打招呼。全晚Avril 送上hit 歌一首接一首，唱到處女細碟《Complicated 》時又好感性話首歌對佢意義重大。安哥後，Avril 請埋老公Deryck 出嚟彈結他，之後Deryck 仲玩咗一首自己樂隊Sum 41嘅歌。Avril 壓軸唱出勁作《Sk8er Boi 》就完騷，搞到觀眾依依不捨咁離場。
