楊怡今晚好重要！
樂易玲（右）明撐楊怡唔係得把口，FBI 見佢成晚只係攬過楊怡影相咋。真實對白
講完現實版《家好月圓》，戲劇版就喺星期日（21日）大團圓結局，今集平均收視有47點，仲高過上一輯結局44點；TVB 使咗13萬喺愉景新城擺50圍，齊齊擔凳仔睇。FBI 都有到，不過數極「家好月圓慶中秋」都唔齊人，啞妹慶陳法拉同阿卡陳豪唔見人，團唔到圓喎！
我唔重要咩？
陳法拉竟然輸畀楊怡，鬼叫你做啞女咩，蝦你冇聲出嘛。設計對白
楊怡同陳豪9月初去澳洲宣傳《家好月圓》，玩到跳起，之後再孖住去馬拉宣傳，不過阿卡場騷就真係一早傾好晒，冇得早走咋！
FBI 走去問高層樂易玲，原來有內幕：「之前陳法拉同楊怡都喺馬來西亞宣傳，公司只畀女演員中其中一個搭飛機返嚟，咁梗係揀楊怡啦，佢今晚好重要，好搶㗎。」咁法拉唔重要咩？「唔係，總之楊怡重要啦！」
樂小姐開到口明撐，FBI 忍唔住同楊怡講番，佢笑到面都紅晒，問佢嗱視后嘅信心係咪大咗，楊怡又傻笑：「大咩？咁咪大咋！」贏張機票都興奮成咁，贏埋視后會唔會強迫症又發作㗎？
