而家連百老匯同衛訊都有得上台出iPhone 3G ，旺角衛訊仲好似3仔門市咁楝咗部加大碼iPhone 3G 喺門口，咁樣兜生意法，你話部機到底好唔好賣呢？
大半個月前收到3仔嘅電話，係一個操唔鹹唔淡廣東話嘅女士打嚟sell iPhone 3G ，雖然好難聽得明佢講乜，但作為IT 記者，總會八卦聽吓佢有乜優惠。幾經辛苦，終於理解晒佢sell 個plan ，原來係叫我出8GB 版，有$0機價，但一定要用$498月費，並簽24個月約，全部同我walk in 去門市出機一樣！而所謂嘅優惠，只係預繳少$1,000（即係都要先畀$3,680）。聽完，我話唔要，佢問我點解，我話個優惠唔吸引，然後收線！
每次行經旺角山東街間豐澤，只要喺門口企一企，過班好勤力嘅sales 就會上前向我sell iPhone 3G 。此情此景，我真係唔明首賣日啲人點解要排隊出機？
陳柒
兩星期前
再收到3仔sell iPhone 3G 電話，好奇心促使我想聽吓佢啲優惠有冇加碼，點知同上次一樣，不過我仍然好有耐性聽晒佢講乜，然後先話唔要，佢又問我點解，我再答埋先收線！
一星期前
再再收到3仔電話，位職員講咗句「我哋有個iPhone 3G 優惠提供畀你……」，我就忍唔住即講「我唔要iPhone 啦，唔該。」然後收線。
早幾日
再再再收到3仔電話，個人仲講緊開場白「你好，我係代表3打畀你……」，我就即講「我唔要iPhone 呀！Bye ！」
經此一役，我體會到政府立例禁晒啲自動打出嘅廣告電話，都係阻止唔到我受電話騷擾，iPhone 3G 你放過我啦！
