近排包剪真係好忙，忙乜？同師奶一齊，忙追熱播劇囉！部《家好月圓糾纏不清多角關係，無論係老嫩，三角戀四角戀，真係睇到班師奶咬牙切齒，原來「七國咁亂」感情瓜葛，幾時都有捧場客。
不過講到好睇之處，始終唔及現實生活戀情咁精彩絕倫，好似由「視帝」鄭嘉穎做男主角、「視后」佘詩曼同「飛躍進步女藝人」周麗淇（Niki）做雙女主角「離淇投佘」連續劇，呢齣真人騷，真係好睇過戲﹗
嗲精發功 非同小可
「嗲精」發功，非同小可，睇同親佢拍劇或者拍電影男星，十居其九都中晒「佘」，好似陳浩民、張智霖、吳卓羲、林同新鮮滾熱辣鄭嘉穎，幾乎所有當紅小生，都無一幸免畀「佘」纏，究竟佢「佘」電有幾勁？不妨睇睇以下個案，就知姣佘Watt數有幾咁厲害。
阿佘同浩民02年拍《情緣汽水機》時「撻著」，佢戀情傳得最耐，傳足6年咁長；後來阿佘同張智霖拍電影《跑馬地的月光》，又傳話智霖女友袁詠儀好唔放心，專登到拍攝場地監場，驚男友畀人纏走；再就係佢同吳卓羲拍《歲月風雲》時亦傳得好勁，身為吳卓羲緋聞女友官恩娜，曾暗指遭阿佘介入戀情。
「佘」電一經發動，就唔可以畀佢停，最近佢又背住吳卓羲同嘉穎撻著，搞到嘉穎同正印女友Niki戀情告急，嘉穎雖然冇認移情別戀，但就話同Niki已經玩完喇！佘浪一浪接一浪，可以講所向披靡，咁就可以證明呢條「艷佘」威力有幾犀利。嘉穎同阿佘呢6年合作無間，佢地一齊拍過劇起碼有4套，正所謂「一次生、兩次熟、三次唔會大結局」，何況佢合作都唔少，戲假情真有乜出奇！現今世代，男未婚女未嫁，本來男歡女愛唔需要大驚小怪，不過如果牽涉到「撬牆腳」、「硬搶」或者「劈腿」話，就難免惹人非議喇！
多角關係 峰迴路轉
依家坊間傳言就話阿佘同嘉穎齊齊衰「劈腿」，一個背住吳卓羲，一個就背住周麗淇，搞到四角關係立立亂。
咁仲不特止，又有人放風話阿佘對呢段「佘穎戀」完全唔隱瞞，不時向身邊朋友「炫耀」同嘉穎拍緊拖，呢件事無綫仲已經傳到開巷添！台前幕後人收晒風，仲有人話單唔係最近先發生，佢仲聽到阿佘咁樣「晒命」：「估唔到個女仔咁蠢，乜都唔知，其實佢男友一向都花心。」唉！做人應該收斂，亦應該留有餘地，玩到周圍唱係咁晒命，就真係唔好啦！咁快就當正自己係勝利者呀？唔係！未過終點都唔知係咪你贏！四角戀其中一個女主角Niki，呢排楚楚可憐、強顏歡笑，心情Down爆。好多網友話，論年紀、身材同樣貌，Niki絕對唔輸蝕得過阿佘！或者可以咁講，Niki可能衰在唔夠嗲、唔夠電力！
《家好月圓》都差唔多播完喇！不過呢套「佘穎淇」連續劇就開始冇耐，吸引力一都唔輸蝕，主人翁錯綜複雜，感情線峰迴路轉，大家記住密切留意劇情發展喇！
如果您喜歡這篇文章，請按「讚」或分享給您的朋友，以示鼓勵。
