早前買咗套《天與地》BD ，一大堆高清飛禽走獸跑嚟跑去，從天上影番落地好鬼有氣勢，咪以為舉機㩒拍掣無乜難度，玩過PS3隻《非洲》後，先知每一個鏡頭有幾珍貴，等足一日為偷影河馬打呵欠，已經算濕碎，有時任務仲要你捕捉犀牛飲水、獵豹撲殺一刻呢類危險鏡頭，實在真係搵命博㗎！
記者：徐影龍
攝影：林柏鈞
Model ：未來（Stage Models ）
鳴謝：SONY 提供攝影器材
動物變大牌Model
現時次世代遊戲以血腥暴力掛帥，PS3最新玩野外攝影嘅《非洲》（Hakuna Tamama ）就如一股清泉，影風景定動物隨你喜歡，指定拍攝任務完全無時限，大可以喺非洲土壤上慢慢Hea ，唔岩影到岩為止。四周仲有好多獅子、犀牛做Model ，當然佢哋唔會企定定擺Pose 再加個笑畀你影，反而你自己要不斷走位嗱角度，好似第七個任務係偷影河馬打呵欠，我就等足一日佢都唔眼
，呢班野獸完全無面畀，總之仲難服侍過Ayumi 。
終於可體驗《天與地》拍攝難度有幾高，搵靚位畀耐性慢慢哺係首要條件，遇到好似長頸鹿咁膽小嘅動物就要離遠啲影，因為好易嚇走佢；遇到獅子、獵豹等兇猛類更要走遠啲，事關佢老哥唔高興就會撲埋嚟搞掂你。當然遊戲入面唔會見紅或Game Over ，不過你會因為暈低而強制返回營地，之前影落嘅相全部無晒，喊都無謂。難度係高，不過有機會一嘗扮CNN 、BBC 嘅專業攝製隊，呢啲經驗又真係幾新鮮。
■身處非洲剛果，學狗仔隊玩偷拍。
■斑馬膽小，要用長鏡離遠先拍到。
■獵豹撲殺場面相當之珍貴。
■唔使驚地圖大行到腳軟，有吉普車載你周圍去。
■SONY α系列正式登場，要努力搵錢換更高級嘅Body 同鏡頭。
《NG 》力撐夠真實
既然影猛獸咁高難度，攝影器材求其啲都搞唔掂，《非洲》就畀你玩現實世界中嘅單鏡反光相機SONY α系列；遊戲初期只畀部不知名雜嘜單反DC 你用，17-55mm 正宗Kit 鏡一支，唔夠Wide 亦唔夠Tele ，遠近效果麻麻，好彩過多幾個任務會正式畀部α100你用，變焦快、連拍快、Zoom 得亦較遠，相片構圖易操控得多，好多玩家不其然感謝α系列嘅來臨，而且會更努力掙錢，買更貴嘅Body 同鏡頭，SONY 硬銷成功！
遊戲另一大賣點，就係有《National Geographic 》撐腰（國家地理頻道），Game 內所有野獸動作及習性均根據現實而設計，唔怪得啲群體活動咁真實喇，絕對唔會出現獅子、斑馬相安無事企埋一齊發呆嘅滑稽場面。值得一提係附設詳盡野生動物資料，由硬照、3D 模型到文字介紹一覽無遺，雖然目前只得日文版，不過年尾中、英版將會推出，當係收集另類《天與地》都唔錯。
■電子相簿收集你辛苦影番嚟嘅靚相，全部有血有汗。
■國家地理頻道提供動物詳盡資料，當百科全書睇都得。
影靚相速成班
今作涉及現實中單反DC 嘅技術，當中光圈、快門對相片互相影響嘅關係，好難三言兩語講得晒，想簡簡單單拍到令人滿意靚相，以下有四招速成伎倆可參考：
1.相片可影橫直度
DS3有六軸感應，扭側手掣就可將相機作橫、直度擺放，令構圖更為靈活。
手掣打橫
影群體或風景，特別有氣勢。
手掣打直
影高身物件如長頸鹿、高樹等。
2.匿埋影特寫
不妨多利用矮叢匿埋，按十字掣更可探頭出外偷影。
3.長鏡玩景深
光圈越大及Zoom 得越盡，景深便越淺（背景變朦朧），主體更突出。
4.Wide 鏡影風景
影令人感動嘅風景，最好用Wide 鏡，以最光點對焦更可玩剪影Feel 。
《非洲》
遊戲類型：生態拍攝
對應機種：PS3
遊玩人數：1人
售價：$358
