8月31日，周日。受古斯塔夫颶風可能升級為五級颶風影響，美國新奧爾良約一百萬居民被強制疏散，本周一颶風將喺得克薩斯州東北及密西西比州西部之間登陸。古斯塔夫可能係美國史上威力最大嘅颶風，對墨西哥灣石油設施造成幾大破壞？事前無法預計。
中國四川南部攀枝花及涼山交界地震達六點一級，災民四十四萬、房屋倒塌十三萬間，其中學校佔六百五十六間，情況亦幾令人惆悵。
保本愈嚟愈難
上周房利美及房貸美因成功賣出40億美元短期債券，令佢地嘅股價急升。家吓兩房已換咗管理層，如政府肯支持佢地嘅優先股（有15厘息）自然好吸引，結果引發上周美股急升，可惜周五已晚節不保。
1987至97年係貪心嘅十年。只要你貪心便可發達；例如本港樓價由每呎2000元升到12000元，升幅500％；恒指由1987年12月1894點升到1997年8月16820點，升幅788％；真係幾貪都得，最終令港人貪得無厭。
1997至2007年可以話係冇回報嘅十年。恒生指數要到2006年8月先升穿1997年8月嘅高位（16820點）。如將去年8月至10月呢三個月升幅剔除，即由恒指低於20000點升上31958點，然後又跌到上周五21261點呢段日子唔計，近十年內恒指升幅其實好有限（而且升幅集中喺國企股身上）。本港一般樓價由1997年每呎12000元跌至2003年3600元，然後升到近日嘅7200元，除極少數（例如20％人口）財富喺過去十年仍上升外，大多數人（佔香港人口80％）手上財富反而唔及1997年第三季。
未來十年又點？恐怕由去年10月起，本港已進入持盈保泰期。除拋空者或投資黃金及石油期貨者外，連股聖畢非德嘅投資由去年10月至今亦減值20％。如閣下由去年10月至今唔使蝕本，你真係威過股聖。我老曹認為去年10月開始本港已進入小心謹慎期。保本變成愈嚟愈困難嘅事，更加唔好妄想增值。甚至CRB商品指數今年7月初見頂至今已回落20％。
Hester Capital Management主席Craig Hester接受彭博訪問，預言明年上半年美國經濟增幅好小或冇增長，雖然今年第二季GDP上升3.3％。
房貸、信用卡貸款及汽車貸款都喺度惡化。紐約大學教授Edward Altman認為企業貸款亦開始惡化。末日博士麥嘉華更認為去年信貸泡沫爆破威力勁過1981／82年；1980年美國負債只係GDP 130％，去年已達350％，其影響將以年為單位。
歐羅今年4月兌1.6美元至今已回落5.8％，係歐羅滙價最差嘅8月。因IG Metal（歐盟最大工會）要求加人工7%至8％，分析家估計未來四季歐羅區GDP升幅只得1.25％；加上俄羅斯出兵格魯吉亞，以及美國計劃喺波蘭部署愛國者導彈令歐盟前景唔明朗。
加元去年升17％，但過去三星期跌幅相當快，喺8月12日見1.072加元兌1美元，上周五收市係1.0633加元兌1美元，估計明年見1.1加元兌1美元，即再跌10％左右。
8月份印度CPI升幅達12.4％、利率高達9厘、第二季GDP只上升7.9％（第一季8.8％）。印度經濟亦迅速放緩緊。
好多人唔滿意
根據Bill Bishop資料，1977至79年美國四百三十五個國會議員中，40％係溫和派；2003至05年已急速下降至10％。根據賓州大學政治科學Diana Mutz調查，有23％美國人對政治好不滿，最不滿嘅階級係教育程度中學或以下，最少不滿係博士。即美國中下層社會對依家嘅政治狀況好不滿，呢個就係點解奧巴馬提出改變後，受到咁熱烈反應嘅理由。可以話2000年至今美國中產及下層社會對依家嘅社會狀況極之不滿，相信呢個同經濟表現有關。美國人口統計局公布，美國中產家庭年收入由2000至07年從58500美元下降到56000美元。呢個係美國戰後首次經濟循環周期完畢時（2000年係科網股高潮、去年係道指另一高潮），美國中產家庭收入唔及上一次！過去八年美國中產家庭收入喺度下跌緊，財富向1％人口集中；去年美國1％人口收入係近八十年內最高（只有1929較2007年高）。美國GDP過去八年仍按3％年度速度上升，但去年美國中產家庭收入反而唔及2000年，唔怪之得大部分人希望改變。
香港雖然冇類似數字，但我老曹覺得去年香港中產家庭收入普遍唔及1997年！過去十年香港中產窮咗；但香港1％人口卻更富有（呢個係今年豪宅售價能超過1997年嘅理由）。
美國7月份CPI上升5.6％，係十七年內最大嘅升幅，相信同政府6月份退稅有關。7月寄出支票較6月少一半，相信8月份CPI升幅將少過7月份，唔排除CPI升幅喺7月見頂。Hyun Song Shin係普林斯頓大學經濟系教授，佢認為美國金融危機正進入第二階段（第一階段係撥備5000幾億美元時）。第二階段將公布信貸蝕咗1萬億美元，開始影響日常經濟。未來十二個月美國GDP增長率將受呢D因素影響。
美國物業市場由2006年第三季至家吓唔見咗17000億美元市值；加上油價由7月至今已回落25％、金價今年3月至今亦回落20％，大部分商品價格亦喺度回落緊，通縮壓力正逐漸浮現。
Business Week分析員James Cooper認為，美國物業情況令金融市場受損傷，搞到美國經濟長時期好唔起嚟，因為由房地產過度興建到消化完成所需時間好長。去年9月至今年4月透過減息一度令美國樓市前景轉好，但今年3月出現貝爾斯登事件，之後係房利美及房貸美事件，令一度曾穩定落嚟嘅美國樓價又再下跌。今年6月至今按揭利率上升半厘又再打擊買樓人士嘅信心；7月份未賣出嘅房屋相等於十點一個月嘅需求（五個月先係正常）。6月份標普Case Shiller房屋指數較一年前跌咗15.9％。其中拉斯維加斯、邁亞密及鳳凰城跌幅近30％，表現較好有沙羅特、達拉斯及丹佛。
OECD曾研究稅與經濟增長（Taxes and Economic Growth），證明稅率愈高，愈不利經濟增長。過去十八個月三十個OECD國家中有九個減稅，全球三十個國家減稅。八十年代英國同美國經濟開始復甦部分理由亦係減稅。今年參議員Dorgan主張向油公司抽重稅不幸畀奧巴馬支持，並計劃擴展到美國企業海外收益上（美國企業海外收益只要唔滙返美國，係唔使畀美國稅，令美國企業可將海外利潤再投資。如滙返美國就要抽39.03％稅。未來唔理係咪滙返去一律要抽39.03％稅。擔心美國企業將減少海外投資，將資金調返美國）。7月15日起美元滙價回升係咪美國企業開始擔心奧巴馬當選；向大企業加重稅務負擔短期有利（例如資金回流、美元滙價上升），長期不利（因未來企業純利升幅下降）。
1980年列根上台為美國經濟帶來重大改變；引發咗1982至2007年美股超級大牛市。明年奧巴馬如上台同樣帶嚟重大改變，令美國經濟返番去六十、七十年代。改變唔係次次都向好嘅方向改變，有時係向壞嘅方向改變。奧巴馬主張嘅改變可令美元滙價短期上升，但對美股則回落，六十五天後如果佢當選，明年美股冇眼睇。
六十年代後期美國國會通過Alternative Minimum Tax法案，向有錢人抽重稅。隨住通貨膨脹上升令愈嚟愈多美國人進入上述法案嘅範圍。喺六十年代擁有25萬美元就算係有錢人，到八十年代擁有25萬美元嘅人又點算係有錢人？結果美國人將大量資金流向海外避稅，令美國經濟由六十年代後期開始停滯不前；明年起美國將重蹈覆轍。2000年起美國中產階級收入唔升反跌，1％有錢人財富卻大幅上升，的確幾令群眾氣憤。奧巴馬提出改變深得中產階級嘅心；站喺投資者立場，上述嘅改變幾令人擔心。
美改變會計制度有疑慮
另一改變係美國會計制度依家係GAAP（Generally Accepted Accounting Principles）而唔係IFRS（International Financial Reporting Standard）。超過一百個國家已採用IFRS，呢個制度已成國際標準；美國最遲2014年亦要加入。美國證監要求最大嗰一百一十間上市公司（佔總市值14％）喺2010年前先行加入，即明年起美國會計制度將由GAAP過渡到IFRS；雖然二者大同小異，採用IFRS後對投資者而言可增加透明度，但過渡期會唔會好似去年美國會計公會要求美國金融機構按市值將債券入賬而引發次按危機？
去年全球私人消費32萬億美元，較2006年上升11％，今年估計升幅只得2%到4％（2001至07年信貸寬鬆期內，全球私人消費上升63％。環球化、低通脹、低入口成本、樓價上升及股市上升，都係令全球消費上升嘅部分理由。中國、印度及東歐新中產階級形成，中東、非洲及南美洲受惠於油價及糧食價格上升，令新興國家私人消費由2000年嘅45000億美元上升至去年90000億美元）。隨住美國次按危機出現不但影響歐洲，同時更向全球擴散，消費信心受油價及食物價格上升打擊；加上全球樓價及股市回落同商品價格高企，今年起全球消費進入低增長期。
MSCI新興市場指數去年共上升40％（雖然晚節不保）。今年滬深A股已跌52％、印度跌37％、俄羅斯跌27％、巴西跌5％、美國、歐洲、英國及日本亦唔見得好好。
據東方網消息，滬深兩地一千六百一十九家上市公司，今年中期業績平均每股盈利23.25分，較去年同期上升7.12％（去年同期每股盈利升幅達52.6％）。賺錢有一千四百家，蝕錢有二百一十九家，虧損面達13.5％。盈利中41.7％由十四家上市銀行貢獻；電力企業賺錢空間極度萎縮，毛利率倒數第二，唔少更陷入虧損。以純利升幅計，A股已唔再係高增長股，呢個係過去十個月A股市場急跌嘅真正理由。
展望明年，中國CPI平均升幅6.8％、巴西5.3％、印度8.4％及俄羅斯14.6％，即喺可見將來新興國家經濟形勢未能轉好。少數受惠國只剩番能源及資源出口國，但佢地亦同時受通脹打擊，好似巴西及俄羅斯係資源出口國，明年所受打擊較少。反之，中國同印度係資源入口國，所受打擊較大。俄羅斯產品只有5％出口美國、巴西14％、印度15％及中國20％，即中國受美國經濟放緩影響最大。
IMF估計2000年全球GDP增長率少於50％嚟自新興市場，到今年全球GDP增長率超過80％嚟自新興市場。今年佢地佔全球GDP 30％，估計到2013年達35％或28.85億美元。即新興市場加起嚟影響力漸超過美國，但明年金磚四國GDP亦進入增長放緩期。中國由去年11.9％下降至明年9.2％、巴西由5.4％下降至3.8％、俄羅斯由8.1％下降至7％，以及印度由9％下降至7.7％……。去年美國次按危機引發經濟放緩期，今明兩年向外擴散；嗰D相信Decouple者過去十個月早已損失慘重。Nigel Rendell係嚟自RBC Capital Markets分析員，認為隨住經濟此消彼長，新興國家遲早有一天同OECD國家經濟Decouple，只係時間上以年為單位，而唔係以月。
去年英國金融服務佔GDP 12％，反而批發項目只佔少於4％GDP，可以話極之唔平衡。上述趨勢由1992年開始至去年係英國金融業直線擴充嘅結果。到去年英國經濟形成金融業獨大，但踏入今年金融業開始萎縮，估計明年繼續萎縮，令英國經濟重返平衡期，呢個調整短期帶嚟災難。英國首相白高敦上周六認為英國正面對六十年內最嚴重嘅經濟危機。英國7月份獲批樓按申請只有二萬二千四百四十八單，較一年前減少65％，平均每單138000英鎊，較一年前減少11.9％，反映英國物業買家持保守態度。
液晶面板業步入寒冬
南非蘭特滙價因白金及黃金價格回落，8月份回落5.1％，見7.6845兌1美元。南非出產全球80％白金及10％黃金，8月份金價回落8％，白金回落17％，引發南非蘭特喺8月份大跌。
日本Nisson Rinkai建築公司上周五申請破產。受地產回落影響，令該公司資不抵債629億日圓（5.785億美元），係今年日本最大嘅申請破產公司，虧損已超過Magara建築公司。
日本政府上周五宣布提供11.5萬億日圓（1058億美元）刺激經濟計劃，包括減入息稅及增加燃料補貼，向中小企業提供貸款及政府增加開支10萬億日圓。因為今年第二季日本GDP又再出現0.6％收縮。
過去十六年日本政府共提供十五個刺激經濟計劃，作用有幾大？由1992年第一個刺激經濟計劃至家吓，效果都係短期有幫助，長期反而拖慢經濟調整。做政府亦要狠心D，例如1973／74年香港政府完全袖手旁觀，令香港經濟喺1973／74年死去活來，但1975年又春回大地。1997年嗰次，因1998年入市干預股市及不斷為經濟提供支持，香港經濟卻一直衰到2003年年中先有轉機，衰足六年半。
上周五馬來西亞政府宣布減稅及增加開支去對付反對黨。今年馬來西亞財赤相等於GDP 4.8％（去年3.2％），未來最高入息稅由28％減至27％；為一百一十萬個家庭提供免費電力；其次係答應明年公務員加人工；減低住宅買賣稅及增加福利開支，令明年財赤進一步上升。林吉特今年已回落2.6％，但馬來西亞股市上周五卻大升，代表投資者歡迎政府減稅措施。今年用喺補貼麵包、煮食用油、燃料及唔少食物支出達341億林吉特，明年將進一步增加。
南韓7月份收支赤字擴大，令8月南韓圜下跌7.1％，成為亞洲區表現最差貨幣；其次係林吉特跌4.1％、新台幣跌2.6％及泰珠跌2.1％。8月份唔少資金由東南亞流出返回美國，美元相信可進一步轉強。
今年起本港地產代理從業員可到內地執業，其中最熱門自然係廣州及深圳一帶，但執業前必需考內地執業資格試並喺三年內必須執業，唔係就要重考。首次課程今年年底前由本港地產代理監管局與廣州市房地產中介服務管理所聯合舉辦，歡迎本港地產代理從業員報名參加。
依家啱廣州資格嘅香港代理從業員只得一百多人。廣州有三萬八千名地產代理從業員，約一千一百間中介公司，每年成交量二千萬方米，其中九百萬方米係二手樓，市場好大。本港地產代理監管局亦同佛山方面協調，將協助本港地產代理執業者獲取當地執業資格。
以本港地產代理從業員嘅搏殺精神，相信喺內地中介行業大有發揮空間；亦係本港樓市淡靜下，地產代理從業員最好嘅出路。
去年液晶面板供不應求，今年第一季達高潮，唔少生產商大量投資生產設施去應付需求；今年6月大廠商聯手降低庫存，零售價開始下跌，而且愈跌愈急，估計二十座玻璃基板窑爐今年投產，令總數由去年第四季一百一十七座上升到家吓一百三十七座，令今年產量上升25％。另有五至七條第五代生產線明年投產，令第五代產能一下子上升40％，呢類生產小液晶屏為主嘅第五代生產線喺明年將面對很大衝擊，令明年液晶面板市場並唔樂觀。至於第六代或七點五代生產線壓力比較細D，唔少人期望聖誕節訂單可以大增。
9月銷售旺季未到，液晶面板價格已跌到接近成本價。從6月開始連續三個月下跌已令生產商努力減產費事跌破成本價；睇嚟液晶面板價格前景唔多樂觀。
奧運並冇為液晶面板帶來井噴，6月開始售價係咁跌，估計第三季部分公司已出現虧損，第四季更令人擔心。根據市場調查機構Display Search首席代表張兵資料，十九吋售價由6月122美元跌至8月88美元，跌幅28％；二十二吋由153美元降至118美元，跌幅23％，主要零組件亦下跌20％左右。估計年底跌幅係30％至45％，液晶面板行業嘅寒冬，今年又再次嚟到。
如果您喜歡這篇文章，請按「讚」或分享給您的朋友，以示鼓勵。
