聽講，生BB 後無晒私人時間，睇場戲都唔得，有無咁誇？楊婉儀（Winnie ）的答案是：「自大女Hannah 出世到現在二仔Jonah 以來，我同老公三年來未睇過一場戲，未試過兩人一齊離開香港，就算兩公婆出街食飯都只係去飲。」噢，代價太大了吧？Winnie 斬釘截鐵：「我唔覺係犧牲，反而人生更豐滿！」
記者：林佩婷
攝影：伍慶泉
場地提供：亮明居（23933933）
■Winnie 之前幫囡囡設計童裝，但細仔出世後太忙而放棄。
罰企角落位1歲1分鐘
從生兒到育女，問Winnie 分享管教良方，兩個BB 有無百厭事，她眼睛睜得大大：「佢哋真係好乖。最嚴重過次係Hannah 咬朋友仔，我就罰佢企角落，佢點喊都唔會理。因為有書提過，定個角落為懲罰位，幾多歲就企幾多分鐘，佢歲半時候就開始企，走20次捉番20次，直至佢企定定，所以一提罰企就好驚。」
同一條妙方用在家姐身上Work ，到管教細佬時卻是另一回事。「有次Jonah 喺飯枱亂掉嘢，我就罰佢企，點知佢好開心，玩完手指玩腳趾，仲撩我哋玩，最後搞到大家都忍唔住笑。」
反對過多課外活動
可見因才施教是老生常談，可惜香港小朋友成日都話要增值，一周四、五項課外活動，Winnie 亦反其道而行：「我覺得喺香港讀書好慘，壓力太大。Hannah 除咗返幼稚園，星期一先會去Playgroup 。佢睇電視見芭蕾舞裙靚話要學，仲想學埋溜冰同彈琴，但我覺得佢太細個。」皆因學習，可以是更生活化的。「我住香港公園對面，所以成日帶佢哋去睇動物，每次去一個部份，保留新鮮感。」孩子天天大，保鮮的育兒法正是學問之所在。
■女兒以前只愛吃米飯，後來轉口味才放下心頭大石。
■Jonah 剛出世，Winnie 就讓Hannah 多抱細佬聯絡感情。
第二胎嘔鑊甘
自言懷大女Hannah 時感覺超級舒服：「始終懷第一胎，我樣樣做足，好多嘢都唔敢食，無嘔又無唔舒服。到有咗Jonah 感覺放鬆好多，除壽司、大閘蟹無食，其餘咩都照放入口，但就食咩嘔咩，連聞到味道都嘔，嘔足半年！過程好唔開心，有時甚至諗早知唔大肚。生兩個BB，最慘都係喺大閘蟹當造季節，我呢個蟹癡惟有死忍，所以呢幾年要食番多啲補數。」
第一胎對自己管制比較嚴，原來對仔女的照顧，情況亦然：「始終我同老公嘅父母比較開放，跟傳統照足規矩點湊BB 唔同。我惟有拚命睇書，要到三歲先敢畀個女食雪糕。但仔仔而家歲幾，我已經畀佢食，就係因為咁家姐先有得食。」
■還有兩星期便臨盆，Winnie 讓Hannah 多接觸她的肚子。
■老公王瑞勳親撰孩子每日餐單。
■讓兩姊弟互畫花臉發揮創意。
■家中有間遊戲房。
搵公仔做細佬替身
事實上生第二胎學問多，Winnie 就諗到搵替身哄囡囡：「當時我買咗個公仔畀Hannah ，話要囡囡負責湊呢個BB ，教佢點餵奶、換片，等佢習慣有個人跟住。有時我甚至俾佢坐我個肚附近，叫佢錫錫BB 。」
做了很多工夫，但當囡囡見到細佬真身，情況始終不同：「最初頭幾星期，Hannah 喺醫院見到Jonah 都覺得好得意。但返到屋企見全家人都集中對細佬好就開始呷醋，成日死黐住我唔放。我惟有同佢講BB 係我、佢同爹哋三個嘅。」到Jonah 大一點，Winnie 就重新分配時間：「利用BB
覺時間陪Hannah ，到Hannah
晏覺我又去照顧細佬。」最近Winnie 做了慧妍雅集會長，會否難以分配時間？「本來都有啲擔心，但一諗到而家自己有小朋友而希望幫更多小朋友，今年主題係籌款助讀寫障礙兒童，好有意義。」
