高清USB手指，是新電子消費產品，用於收看數碼廣播高清電視在電視機及電腦環境。高清USB手指取替機頂盒，因為USB手指價格比機頂盒較為便宜，不佔太大空間，更可以隨身，適合手提電腦使用。
正所謂十隻手指有長短，但現時巿面何止十款高清USB手指？唔知邊隻好，最穩陣始終係揀番大牌子。Hauppauge的WinTV最近推出首支DMB-TH高清USB手指，最勁是天線拉開有成隻前臂咁長，由北角行到銅鑼灣成條東區走廊都收得到，掃齊晒十三條數碼頻道任睇。
高清USB手指在新年後忽然冒起，全因售價遠較機頂盒便宜，一隻手指才八百多元，比升級版機頂盒平大半，加上唔使插電咁麻煩，方便筆記簿電腦用家隨插即睇電視，還支援錄影等多項數碼功能，切合初玩數碼廣播的用家要求，所以今次一於帶WinTV手指周街試睇高清電視。
愈空曠訊號愈強
現時香港只得慈雲山發射站啟用，最遠都係射到港島北，遠少少的話就要靠巨型鑊才收得到，所以小記便選擇了東區走廊一帶作測試地點，結果發現愈空曠的地方，訊號愈強畫面愈穩定。好似糂魚涌公園、北角碼頭至銅鑼灣維園，都可以掃齊十三條數碼頻道，坐車行經東廊時，拎住筆記簿電腦都可以睇直播節目，代理更表示，WinTV手指支援多載波頻譜，就算高速移動都可流暢收看電視，確實又幾方便。
A WinTV高清手指的外表與一般USB手指無異，毋須插電即駁即用，帶出街唔怕阻地方。
B 遙控器仿照家電設計，有齊選台、錄影和多媒體操控功能。
C 底部備有天線插位，出街連接流動天線，便可以四圍睇高清數碼廣播，奧運期間包無失場。
D 流動天線拉開後，有成隻前臂咁長，戶外接收能力特強。
錄影需留意處理器
不過當一行到入屋苑旺區，被高樓大廈包圍便開始出現窒格情況，落到地鐵更加乜都收唔到，睇怕巿區想邊行邊睇高清都幾難。如果想享受郊遊睇高清的樂趣，不妨試瑶九龍公園、城門水塘等位處接收範圍，而又較為空曠的公園地段。
除了錄播高清節目之外，WinTV亦有EPG電子節目表、多國語言字幕、全功能遙控等基本功能，同屋企睇高清沒多大分別。不過想錄影高清的話，就建議閣下的電腦須預備P42.5GHz以上處理器、1GB以上記憶體和高容量硬碟。
D2手指效能差不多
睇WinTV碌天線咁大支，就知它在戶外的接收能力有番咁上下，不過如果閣下唔係成日四圍走，不妨考慮較平的D2高清USB手指。它的功能與WinTV接近，支援EPG節目表、預校錄影、雙語廣播和遙控功能，在屋企用電腦錄播高清節目，或者跑到接收力較強的地區，一樣可以邊行邊睇電視，算是另一高清手指好選擇。
