你想打落水狗呀？（設計對白）我係莊，你係閒，識做坐歪啦！（設計對白）
風水輪流轉，昔日貴為金牌一哥的古巨基，曾多次出招迫經理人Paco （黃柏高）為他爭取樂壇大獎，與李克勤及陳奕迅結怨。不過，近年人氣下滑的他，因為吊高嚟賣，Paco 考慮明年初約滿後不會跟他續約。古巨基現正四出搲撈，但因為以前辣著唔少火頭，前景未見明朗。
轉會未有著落的古巨基，為了保住曝光率，早前向無線自薦做奧運主持，但宿敵李克勤知道後，隨即背後發功，向無線表明上京做主持有佢冇我，結果克勤霸到開幕閉幕最靚位，古巨基只做田徑賽4日主持。
古巨基早前曾以同中國「欄王」劉翔稔熟作籌碼，成功搲到做奧運主持，不過劉翔因腳傷退出奧運比賽，而本來諗住可獨家訪問到他的基仔，撻Q 收場！《蘋果日報》圖片
克勤是無線親生仔，開幕禮同閉幕禮都有份做主持，而死敵古巨基則兩part 都冇得做。《蘋果日報》圖片
六月尾無線公布奧運主持名單，除了原有的鄭裕玲、李克勤、方力申、楊思琦外，突然多了一個古巨基。原來，古巨基不忿Paco 只幫愛將方力申爭取，所以私下與助手女友Lorraine 向無線獻媚，自稱跟「欄王」劉翔相熟，保證可在比賽後第一時間訪問到他，最後攝位成功，可上京擔任主持。
18日是古巨基36歲生日，雖然要在北京工作度過，他一啲都唔介意，16日出席完港台活動後，fans 為他預祝生日。
眼見約滿在即，轉會依然未有著落，古巨基有意翻兜Paco 。上周六，一向貼身照顧男友的Lorraine ，全程捉實公司高層Andy Lai 密斟。
克勤拒絕同場
據知宿敵李克勤知道後，以契仔身份跟無線申明，在奧運期間決不跟古巨基同場，最後無線巧妙安排，克勤做奧運開幕禮及首數天主持，然後讓他返港錄音，再返京做閉幕，至於二奶古巨基，只能負責18至21日的田徑賽事。至於方力申除了主持耍家的游水項目，亦有份出席24號的閉幕禮。古巨基為增曝光率，淪為阿二都冇計，但問到自薦做主持，他死口不認：「係無線體育組搵我，我係主持出身，之前都主持過奧運……」
求證奧運監製李漢源，他說︰「當初籌備時，主持人選好多，邊個適合咪邊個做咋。（古巨基都有檔期，點解冇得做閉幕？）總之一早定咗係咁。（咁巧合，克勤走咗基仔就上京？）啲藝人個個都忙，度期好難，咁克勤走咗幾日基仔先上去，唔係接住。」
據知Paco 之所以不再與古巨基續約，與之前古巨基私下接廣告不無關係。一向自把自為的古巨基，無論宣傳、訪問等也交由女友助手私下斟洽，甚有架空Paco 之嫌。
劉翔決定退出比賽之時，基仔在鳥巢內，失望表情比主角更甚，更一度低頭眼濕濕，表情過分浮誇，被網民批評：「講到好似劉翔死咁！」
做奧運主持，古巨基採取少講少錯政策，還不時睇貓紙添！
國語碟銷量差
去年，古巨基曾發功，迫Paco 全力為他在年尾爭獎，甚至要犧牲同門的側田和方力申的獎項，當時Paco 鑑於他是公司最賺錢藝人，忍氣吞聲。07年嗱了「最受歡迎男歌手」後，古巨基人氣不升反跌，除成了票房毒藥，唱片銷量亦強差人意。上月古巨基在台灣推出的國語碟，銷量亦不到一萬張。加上早前他向Paco 自抬身價，自稱有唱片公司以2千萬兩年的天價羅致他，終令兩人決裂。
對於續約，古巨基死撐：「我好忙，之前去台灣宣傳國語碟，依家又去北京主持奧運，等我得閒啲先傾啦。（Paco 有冇搵你？）佢都好忙，搵日大家都得閒先啦！不過Paco 都係首選。」其實合約得番半年，有誠意嘅就已經傾咗，好似06年千嬅約滿，Paco 一早便飛到內地與她傾約。今時今日的古巨基，人氣下跌外仲有樣弊，香港大型唱片公司都有他的死敵，東亞有千嬅，環球有克勤，正東有陳奕迅。想泊大碼頭，真係有難度。唔怪得近日要翻搲Paco 啦！
隱形主持
古巨基出發前滿有信心，表示自己已熟讀資料，不怕受網友抨擊，不過《娛樂新聞眼》主持出身的他，今回卻甚少發言，原來基仔採用少講少錯的對策，不過卻被網友批評佢冇嘢講，差啲留意唔到佢喺直播室。
犯眾憎
古巨基的女友兼助手Lorraine ，由基仔出道以來，為了男友星途，經常主動向電台DJ 、記者斟茶灌水、打牌鬆章打關係，收買人心。為了提升基仔地位，更不惜放暗箭，是非當人情，搞到犯眾憎。
暗插楊千嬅
05年，楊千嬅和古巨基同獲「2005年十大傑出青年選舉」提名，不過有人四圍唱千嬅根本未夠資格嗱「傑青」，千嬅知悉後，即向老闆黃柏高投訴，更激動到拍枱。
中傷陳奕迅
陳奕迅亦早有聽聞被人出口術中傷，06年新城勁爆頒獎禮上，古巨基以六個半獎成為大羸家，力壓陳奕迅和李克勤，惹起他們的唱片公司正東、環球不滿，拉隊缺席慶功宴，事後Eason 話：「我覺得質素比數量重要！」明寸古巨基。
惡評李克勤
李克勤、古巨基、陳奕迅同是最受歡迎男歌手大熱，不過有人大肆批評克勤唱歌和造型娘，未夠班嗱男歌手獎。
