8月15日腹部圓潤 15日下午周慧敏出現機場時，雖然穿鬆身恤衫，但亦難掩圓潤微隆的腹部
愛情長跑達19年的周慧敏與倪震，一直對外宣稱有共識唔生育。不過兩個月前，有雜誌指Vivian 睇不育專科胡信忠，雖然事後女方向外界否認睇醫生求生仔秘方，但卻甚有保留說︰「如果意外懷孕都會生落嚟，盡能力養佢。」
8月15日，本刊發現到北京睇奧運的周慧敏，不但肚凸凸，連日來更穿上鬆身衫遮掩腹部，男友倪震則出入貼身服侍。而周慧敏一場到北京，除了睇賽事外，全程都留在酒店休息，反而倪震則獨自外出遊逛兼睇樓，似為北京置業做準備。
甫下機的周慧敏，面露疲態，眼都擘唔大。
08年6月 一向自稱廿四寸腰的Vivian ，6月初在跑馬地買西餅時，大熱天時突然穿上長袖衫又圍頸巾，當時她已經有少許肚凸凸。
6月份，周慧敏以一襲鬆身裙出席公開活動時表示︰「我冇打算改變生活計劃，但如果意外懷孕都會生落嚟，盡能力養佢。」明顯對生仔一事，採順其自然的態度。至於倪震早前接受好友麥玲玲訪問時，亦坦言近日有同周慧敏再談及生仔一事：「最近有個朋友，生咗個BB 好得意……好玩到呢……我返去同Vivian 講，Vivian 話：『要唔要生
？』……」麥玲玲亦批倪震命中有一子一女，只係睇佢要唔要。
8月15日下午，穿上鬆身恤衫的周慧敏，與男友倪震現身北京機場。雖然只是短短三個小時機，但周慧敏似乎有點疲態，站著等倪震問路時，她叉晒腰，更要按住手推車借力。而一向輕盈的Vivian ，不但腹部圓潤了不少，步伐亦突然變得緩慢。迎接兩人的專車一早在機場等候，倪震亦細心為女友開車門上車，之後便前往下榻的國貿飯店。
翌日早上，兩人便乘奧運專線，到體育館欣賞奧運賽事，這天Vivian 換了一襲鬆身的裙子外出，直至下午二時許才拿著外賣回酒店。4時許，只見倪震一人離開酒店，Vivian 沒有同行。
8月16日突然睇盤 經紀出來招呼倪震，並手指指告訴他樓盤的位置。
倪震望住溫沙大道的樓盤，似乎甚有興趣。
睇高價樓盤
步出酒店後，倪震邊行邊問路，幾經兜轉，終於來到秀水街附近，只見他在地產公司「我愛我家」門外睇樓盤廣告，其間地產經紀出來招呼，倪震似乎對當地的樓盤甚有興趣，不停指手劃腳向經紀嗱料。談了廿多分鐘，倪震向經紀取了卡片便離去。
記者之後問番該經紀，他表示︰「那個香港人（倪震）？他問我有關溫莎大道的資料，似乎很有興趣，還叫我把名片給他日後聯絡。他想找個高層的大單位，現在約賣八百至一千萬人民幣左右。」
去完地產公司之後，只見倪震漫無目的遊逛了兩粒鐘，到了秀水街一間超市，他在奶品部揀了好耐，更把鮮奶的成分逐一審視，左挑右選下，終於買了一瓶奶返酒店。
溫莎大道03年開盤，樓高三十層，鄰近世貿天街等商業區，是當地熱炒樓盤之一。
熱炒溫莎
倪震睇中的溫莎大道，是以公寓為主的商住兩用住宅，位於朝陽區光華路，是中央商務的核心地帶，加上鄰近國貿中心，北京市80%以上的高級寫字樓和高檔飯店都集中在附近，故樓價
升得好快。
溫莎大道，除酒店式公寓外，豪宅單位由二千多呎至四千多呎不等，呎價由二千五至三千元人民幣不等。四千多呎的單位，月租可達3萬元人民幣，所以自住外，作為投資亦有不俗的回報，加上樓價升幅看好，故引來不少炒家買賣。
8月16日 下午2時，倪震與Vivian 睇完比賽返酒店，倪震手持外賣盒，兩人嗱番酒店慢慢嘆！
晚上7時，Vivian 與倪震再出動，倪震仲鬼咁好服侍，幫女友開埋車門添！
免費奧運飛
晚上6時半左右，倪震拖住周慧敏落樓，兩人上了車子到鳥巢及水立方體育館，欣賞當晚的田徑及游水比賽。凌晨時份返到酒店時，只見Vivian 滔滔不絕與倪震談論賽事，聽到她說︰「佢真係游得好快……個姿勢好靚呀呵……」
其實Vivian一向鍾意睇田徑及游水比賽，但據知倪震今次去睇奧運，乃無心插柳，原來肥谷（谷德昭）有個老友，其公司贊助了奧運專車，於是肥谷幫倪震嗱到兩張包一天賽事及兩晚住宿連接送的京奧套票。倪只需買機票，便可以偕女友上京睇奧運，岩晒呢對慳家情侶。雖然是三日兩夜的行程，但為免Vivian 舟車勞頓，所以除了睇比賽，倪震便著Vivian 留在酒店休息。
心情勁靚
就凸肚疑似懷孕及北京置業一事求證Vivian 。19日黃昏，她揸車到北角友邦廣場停車場泊車，記者上前訪問，她笑笑口打招呼，心情靚爆。
記︰去咗北京睇奧運？
周︰係呀！睇咗游水同100米短跑，好刺激。去咗兩日咋，要趕返嚟做嘢。
記︰見到倪震睇樓盤喎。
周︰佢睇吓啫。
記︰有冇諗過喺北京置業？
周︰睇吓先啦。
記︰係咪有咗BB ？
周︰冇呀……（有冇plan ？）……你邊間㗎……冇呀……（說罷匆匆離去）。
其實，03年由加拿大回流返港的倪震及周慧敏，雖然曾多次表示視貓、狗為兒子，但據知老爺倪匡十分恨抱孫，始終倪震是獨子，他當然希望Vivian 可以生番個金叵籮，為倪家繼後香燈，早前更以「105分好新抱」大讚Vivian ，希望可以感動對方。
而步入四十歲後，周慧敏眼見身邊老友個個結婚生仔，難免心生羨慕。知情者話：「有次同Vivian 傾開偈，佢話克勤生咗Ryan 後，成個唔同晒，又話原來BB 嘅感染力咁神奇，講人哋個BB 都咁雀躍，我哋咪笑佢叫佢生番個，佢話︰『都有諗過！』」
未來老爺倪匡（右二）當正Vivian 係新抱，更以軟功游說她生仔，並公開大讚她是「105分新抱」，睇怕倪匡恨抱孫恨到出面！
鍾意買樓投資
喜歡低調的周慧敏，鑑於香港狗仔隊太多，曾向男友倪震提出搬離市區。兩年前，他們更透過相熟經紀，在上水等偏遠地區物色樓盤，更曾到「邁爾豪園」睇三千多呎的獨立屋。雖然最後都冇買，但一向屬穩陣派的Vivian 亦承認，遇岩好樓盤便會投資︰「我鍾意郊外，置業我隨時都可以，市道OK 就可以買，反正買樓可保值，又唔係風險投資。」而近年拍廣告賺近二千萬的Vivian ，要在北京置一個千萬的行宮，真係話咁易。
8月16日搵路行 步出酒店後，倪震仿如迷途羔羊，頭「岳岳」四圍望，更邊行邊問路。
睇家品 原來風流才子都鍾意睇家品，突然多咗份住家男人feel 。
發短訊 其間他不停打電話又send sms ，唔知係咪向女友報到？
試手繩 喺Fendi 試過幾條手繩，但一樣係搞搞陣冇幫襯。
揀鮮奶 去到超市，左揀右揀下，終於買咗蒙牛出品的「冠益乳」，仲鬼咁細心睇成分，最後佢帶返酒店，唔知係咪俾Vivian 飲呢？
運吉兩小時
8月19日鬆身裝循環著
當日Vivian 一身衣著，與15日出現北京機場時一樣，不過愛穿貼身衫的她，近日頻頻以鬆身衫及平底波鞋示人，真係有啲嘢喎！
6月尾，Vivian 出席活動時，一樣穿上鬆身裙，留意條白皮帶又係過條。
兩人入住的普通雙人房，要三千二百元人民幣一晚。
Vivian 與倪震所住的國貿飯店，屬於四星級，到鳥巢約廿多分鐘車程。
除了包住宿，據知倪震與Vivian 坐的奧運專車，亦是老友提供。奧運專車可以在奧運專線上行駛，普通車輛不能駛入，不怕被記者跟蹤。
萬八蚊睇奧運
Vivian與倪震今次的奧運行程只逗留兩日，15號到北京，17號下午就離開，加上奧運飛、住宿、膳食及專車，都是朋友贈送的套票，所以成個行程二萬蚊有找。
機票 2張商務客位（連稅）$9,000/ 位 $18,000
