外牆油上綠色嘅「水陸潮樓」，非常搶眼。
我發錢韓有好多嗜好，其中一樣就係養魚，成日會去旺角出名嘅金魚街行吓，所謂金魚街就係指通菜街、旺角道同埋水渠道一帶，呢頭好鬼多人，但最近發現啲水族鋪好似少咗幾間，以前成條街都係水族鋪，但係而家多咗啲寵物店同埋食品鋪夾雜其中。原來有部分水族鋪都游咗上樓，等我發錢韓發揮八卦精神去了解吓先！
水
園主要售賣水草和水晶蝦。
同附近地產代理Kelvin 傾開，佢話呢幾年，金魚街嘅地鋪租金愈嚟愈貴，閒閒哋一個鋪位都要7、8萬租，有幾間水族店捱唔起貴租，唔再續約，不過呢條街好旺，大把鋪頭爭住租，好似通菜街171號地鋪為例，最近就以月租9.5萬成交，估計會開食店。「大部分嘅鋪都會由食肆頂替，小部分會係寵物店，其實近呢幾年都冇乜新嘅金魚店開喺地鋪。」
Jackie 唔擔心樓上鋪生意，認為金魚街人流旺，只要多做宣傳，啲人都會識得上樓購物。
2萬蚊租樓上鋪
雖然地鋪冇新嘅水族鋪，但畀我發現樓上鋪就有新嘅水族鋪開張，好似「水陸潮樓」唐樓咁，原本空置咗幾年，後來業主改為商業用途，見到大廈4層鋪位都已經租出，暫時有兩間水族店開咗，同其中1間新開張嘅「水
園」老闆Jackie 傾開，佢話自己係養魚發燒友，今次第1次開鋪，「我一直都想喺金魚街開鋪，但係地鋪租金好貴，300呎鋪起碼要8萬蚊起，我搵咗一排，發現呢度有棟大廈，400幾呎租金只需要2萬蚊，仲包埋管理費，租金同地鋪差成截，就決定開樓上鋪試吓。」
Jackie 間鋪頭開業2個月，主力賣日本嘅水晶蝦及品種獨特嘅水草，暫時生意ok ，可以收支平衡。「我覺得樓上鋪除咗租金平外，都有一啲優勢，就係環境比較寧靜，同埋唔需要太多人手看鋪。」不過樓上鋪必須做宣傳，Jackie 除咗喺一啲水族發燒友嘅討論區post 資料外，亦打算喺雜誌落廣告，同做網站宣傳。
其實除了「水陸潮樓」外，金魚街亦有一啲細規模專賣鯉魚同珊瑚嘅水族鋪搬咗上樓，睇嚟金魚街嘅經營模式會慢慢改變，第時想買魚，記住要行埋啲樓上鋪啦！
PROFILE
發錢韓，本身姓韓，由於見錢眼開的性格，所以朋友均稱呼他發錢韓。百足咁多爪，平時鍾意四圍八，與不同行業人士吹水收風，了解香港商機走勢。
