上週五，郭晶晶男友霍啟剛（中）、弟弟霍啟山（左）同媽咪朱玲玲，齊齊現身水立方為出戰女子3米板預賽的晶晶打氣。你睇佢哋睇到幾入神！《蘋果日報》圖片
今屆奧運喺我哋祖國舉行，國家隊又日日嗱金牌真係大快人心；特別係睇住嗱咗雙人跳水金牌嘅郭晶晶，人靚金牌閃夠晒賞心悅目，有雜誌仲話霍公子特登去咗北京雍和宮求咗條奪金紅繩保祐女友勝出。
之不過FBI 日睇夜睇，留意到樣嘢喎，除咗郭晶晶、男子體操個人全能項目中奪金嘅楊威啦、男子團體體操隊6位成員同吊環嘅陳一冰啦、沙灘排球嘅吳鵬根等等個個都有紅繩傍身，唔通霍公子順手求埋咩？
楊威接受內地傳媒訪問時話，條紅繩係帶來一份順利，佢隊友鄒凱就踢爆係成隊體操隊一齊去寺廟求番嚟，開咗光㗎。
FBI 半信半疑，八八卦走去問吓堪輿學家麥玲玲師傅啦，麥師傅話呢種紅繩係屬於密宗幸運繩，「可以帶來健康、好運，對嗱金牌都有幫助，就算唔係信佛教密宗都戴得。」之不過嗱金牌又好、嫁入豪門又好，始終係講實力嘅！
香港觀眾睇國家隊奪金睇到磨拳擦掌，睇電視台班奧運主持都一樣，海軍鬥水兵，水鬥水。
FBI 同無線外事部副總監曾醒明傾開，佢就撐硬自己友話大台多人睇先多投訴啫，「今屆派出咁多新主持，好似葉翠翠、張嘉兒咁，都係想佢哋儲多啲主持嘅經驗啫；而阿叻話即使有錯都會照舊（主持），其實係佢性格唔輸得，實則佢會改嘅。」死雞撐飯蓋無謂講，但係要我哋硬啃TVB 借奧運教仔就無辜啲咋。
無知
發癲
左：李思雅評述衰似呻吟，豬港姐張嘉兒亦由於頻頻講錯嘢，被網友狂轟佢冇sense 。為免再得罪觀眾，傳聞TVB 自上週六決定將豬港姐同李思雅調離北京直播室之列。
右：楊思琦亦因為表現過high 兼內容白癡，被網友大肆抨擊，因住成為下一個被飛。
