講《Survival Kids 》，你未必知係乜；一講《Lost In Blue 》，係咪即刻明晒先？
其實《Lost In Blue 》只係《Survival Kids 》登陸NDS 時所用的番外篇名稱，自99年《Survival Kids 》在GBA 上首面世後，此系列推出共4次，只曾在手提機上出現過，唔計GBA ，其餘3次都係NDS 上非常注目好玩的名作。
今次在家用機Wii 上推出，將原來隨身玩的荒島求生日誌搬離身，新玩法係咪同遊戲主角一樣要等天父打救呢？願天父與你同在，阿門！
Spec.
機種︰Wii
類型︰ADV
人數：1-2人
廠商︰Konami
售價︰$328
主角Akira 參加郵輪假期，失事流落荒島，玩家既要維持Akira 生命，包括起居飲食，又要諗計逃離荒島，只要唔死，玩幾耐都得，係爆唔到機咁解。
有隻馬騮陪你幫手搵吓食物。最初身無長物又冇工具時，只有同馬騮一齊搖樹搵生果解渴充飢，最慘生果係食極唔飽。
流浪途中遇到另一女主人翁Lucy ，以為有女陪就大錯特錯，以後Akira 要照顧埋佢的生活，仲會扭計要食海鮮，或嗌眼
要休息，完全阻礙逃生進度。
體感求生
經典作搬落Wii ，體感元素係最大賣點，甚麼鑽木取火、釣魚搵食、粗重工作統統要求玩家親力親為，和遊戲主角共同進退，玩家玩落自然身水身汗。而從手提機移植落家用機，玩法除脫險求生外，亦加入大量mini game 及可2人進行遊戲，但雙打mode 只支援mini game 及部分要求一起完成的遊戲，若玩主線Survival Mode ，仍只靠1位玩家帶領遊戲。
4大求生秘技 體感示範
所謂求生技巧，不外乎搵食煮食、製作道具同逃生伎倆，當你學識相關技術後，就會成為Mini GameMode 內的小遊戲，仲可以作2人對賽，玩落仲好似《Cooking MaMa 》添。
鑽木取火
遊戲內火非常重要，冇火就唔夠暖，唔可以
；冇火又唔可以煮熟食物同美食，Lucy 會詐型，生火前記得要執木條，否則生唔到火。
方法：將雞髀同手掣前後勁搓，搓到夠熱就立即用手掣左右撥風，有效收bye bye 肉。
石板煮食
荒島冇鑊，只得石板，生火之後就可以石板煮食，不過石板只限露宿營地擁有，喺荒島執完食物就要返營地煮，一來一回好頻撲。
方法：明明喺荒島，但唔知邊度搵到個夾，見到塊肉出煙就按實AB 掣夾起再擰一擰手掣燒另一邊，再出煙就夾起，自動成為食物。
紮木技工
自製道具一般不離用木同藤繩，見到就不妨執多一點，不過有時會需要特別木材如浮木造木筏、長木做撐竿或軟木做魚竿。
方法：執乜木都好，最重要係識用藤繩紮埋一齊，按A 掣捉實條繩，再跟箭嘴方向搖就當紮咗。
划艇精英
紮埋紮埋咁多道具，為乜？逃離荒島嘛，所以Akira 經常紮木筏然後划艇逃脫，可惜每次都失敗而回，想走？就要跟故事情節逐步逃離。
方法：要走得順利，就必須學識划，手掣同雞髀代表划右同划左，將手掣作划艇狀就可以。
2人競技有乜鬥？
再提多次，可以雙打並不代表2個人一齊協力逃離荒島，全因遊戲內除Akira 仲有Lucy ，於是另一個人就仲發緊脾氣嘅Lucy ，同Akira 一齊玩遊戲解悶兼順番條氣咁解，咁樣雙打法，係咪無聊得滯呢？
學鬥牛尋歡
都話Lucy 係大小姐好野蠻，居然扭計玩騎牛牛，考你用手掣保持平衡，唔好超越彩色範圍，唉，不如留低做土皇帝算啦。
划艇避鱷魚
多個人即係多個機會一齊划艇，假如得一個人玩時就自己划，多雙手就加多個人一齊划，仲要避埋鱷魚咁驚險添。
人獸合唱團
Lucy 最叻就係唱歌，玩到咁上下就會約埋班動物一齊玩唱歌，遊戲類似《應援團》式按掣加節奏動作，同逃離荒島一事離晒題。
迫你爆機玩隱藏關卡
《Lost In Blue 》慣例，爆一次機後就會有「女仔Mode 」，即係掉轉身份，玩法變成Lucy 諗計逃脫，兼照顧埋Akira 。由於女仔體力同技能差男仔一截，玩落難度更高，除此之外，仲會多一個「Sealgal &Milk Mode 」，原來荒島上仲有一對男女，同為郵輪意外的生還者，而呢個mode 只係另一個mini game 版，入面會有一些2人競技的環節，筆者仲未打爆機，所以無緣試玩。
睇玩法，似乎係要在指定時間內，在島上搜尋指定物品，至於點鬥法，仲未有其他人爆到機擺上網話我知。
總評：難度大增略嫌趕客
呢類實況求生遊戲都要求玩家經常接觸遊戲，所以非常適合手提機。移植到家用機後，遊戲性豐富了，代表難度亦增加不少，更要玩家每日返到屋企立即開機逃脫，令即時逃生的感情減退不少。雖增加大量mini game 務求加強遊戲性，但玩家必須爆一次機至玩到，筆者連玩3日已覺得好難玩，相信爆機日遙不可及矣。
