李八方
隔牆有耳
欄王劉翔因傷退出，無緣衞冕奧運金牌，見到佢隻腳痛到
吓嘅時候，八方相信睇到嘅人，都感同身受個心隨住佢蹣跚腳步而抽搐，目睹欄王離開鳥巢跑道時，大家真係心都碎晒，過去四年佢南征北討屢創新績，偏偏喺自己國家土地上卻跨唔過傷患呢一關，莫非中國欄王時代就此告終？
劉翔奪金不成，全民唔開心，自由黨主席田北俊可能例外，據知佢本來上京睇郭晶晶跳水同劉翔出場，但由於要上電視，出席噚晚舉行嘅首個電視直播選舉論壇，所以無奈錯過置身歷史場面，親眼目睹跳水公主精采表現同嗱金牌時刻，有自由黨人話畀八方知，田少對此都有啲不快，但為咗選舉，惟有放棄欣賞奧運賽事嘅機會。
好彩田少唔蝕底得晒，因為劉翔噚日因傷退出，如果田少入咗鳥巢，就同其他人一樣失望而回，白行一趟固之然唔抵，希望越大、失望越大更心傷，親眼見到劉翔負傷離開，真係心都
埋。今年張入場券冇用，希望劉翔四年後捲土重來，田少下屆可以去倫敦捧佢場。
金牌選手或訪港
民主黨副主席單仲偕噚日上京，佢話都對欄王退出奧運賽事感到非常失望，因為此行就係想睇佢出場衞冕金牌，而家冇咗機會，心情都略受影響，希望劉翔好快就康復可以再出戰。單仲偕今日會睇田徑賽，劉翔冇份比賽，會同其他選手打氣。
除咗田徑賽，單仲偕亦會睇游泳10公里賽同足球決賽，前者既考驗選手耐力，更係觀眾耐性嘅重大挑戰，不過單仲偕今年唔參選，大把時間睇奧運，唔怕悶。據講金牌選手喺奧運結束後會集體訪港，感謝港人熱情支持，有人認為可能係幫民建聯、保皇黨造勢嘅安排，亦唔排除民望低迷嘅特首煲呔乘機抽水，借健兒提升自己民望。
劉翔退出比賽，即係話好大可能唔會訪港，八方希望有關方面破格畀劉翔嚟香港，安撫一班支持者，劉翔見到咁多人撐佢，相信對療傷都有幫助，運動員鍛煉好重要，有人打氣亦唔少得，相信香港人都想劉翔跨過呢一關，向2012奧運進發，下屆奧運我哋一定繼續捧「翔」。
