上星期，本刊找來多位主持做突擊測試問卷，如鄭裕玲、方力申、李麗珊等，阿叻一見問卷就掉頭走。又難怪嘅，佢嘅奧運常識咁水！
奧運比賽幕幕精采，最弊無線亞視兩台主持水鬥水，開鑼至今僅一周，有人講多錯多，有人廢
當秘笈，最要「佩服」係連日被轟唔夠pro 嘅阿叻陳百祥，竟辯駁自己係「專登錯」，還叫網友返屋企
，甚至寸爆話：「總之意見接受，一切照舊！」咁嘅態度，難怪網民群起攻之，送阿叻一隻「死雞」啦！
無線播奧運開幕禮，最高錄得42點收視，本周一舉行祝捷會，被網友狂轟的阿叻依然飲得杯落。
阿叻
阿叻被投訴講嘢太多、資料唔齊，又經常炫耀自己跑馬和踢波的威水史，引起網友不滿。本周日（10日）晚中美籃球賽事，他又亂
廿四問：「點解Kobe （高比拜仁）做guard 嘅？佢進攻咁勁！」又說姚明係傷癒復出打第一場，即時被在旁的翁金驊糾正，姚明之前已打過熱身杯賽。阿叻被網友插連基本資料搜集都冇。
其實衰咗唔緊要，阿叻事後竟死撐，「叫網民返屋企
啦，我不嬲我行我素，以娛樂為先，總之意見接受，一切照舊！」他又話：「我只係想做到莊諧並重，有啲嘢我係專登講錯，我只係主持，唔係專家，唔會打擊到我嘅自信。」報道一出，即被四方八面圍剿，更有人放一張死雞撐飯蓋的照片上網，來揶揄阿叻唔認衰，夠晒啜核！
對於網民意見，無線外事部總監曾醒明表示：「阿叻不嬲都咁自誇，其實佢私下都會接受觀眾善意批評嘅。」
周日中美籃球賽當晚，楊婉儀難得開口，但竟將運動員易建聯（下圖）講成「e 見樂」，事後被網友狂插。
生完個腦係轉得慢啲！（設計對白）
楊婉儀
做大騷一向口才唔錯的楊婉儀，一講到運動原來好水皮，做夜晚焦點重溫時頻頻食螺絲，講一句說話好多個「er ……」，說話速度又慢得驚人。本周二晚，節目一開始，楊就情緒高漲地說：「嘩！中國已經嗱咗20面金牌啦！」即時被潘宗明糾正說：「係20面獎牌！」搞到楊面懵懵說：「吓，sorry ！」瘀到爆！
我哋姊妹同心，賴咗鑊甘！（設計對白）
張嘉兒
張嘉兒早前被指係「豬扒港姐」，自從佢主持奧運後，又被起朵為「無腦港姐」。冇他嘅，佢見郭晶晶跳水冇水花，竟說成「冇火花」，「中華台北」講成「台灣」、「俄羅斯」講成「蘇聯」。咁……真係幫佢唔到
！
李思雅
曾為香港網球代表隊的李思雅，選完港姐，即被編入主持體育世界，體育常識理應有番咁上下，點知佢成日問埋啲白癡問題，發表意見只識話：「嘩！好犀利呀！」、「啲動作真係好順喎！」說到體操李小鵬弄傷手踭，佢又話：「啊……好痛呀……啊！」廢話連篇，真係唔講好過講啦。她事後被轟把聲太尖夾冇point ，更似在呻吟。
為此曾醒明說：「新人嚟講，佢講嘢係多咗啲嘅，評述員講緊嘢，佢講咗啲唔適合嘅話，不過佢網球方面認知係ok 嘅！」
失魂孖寶
思琦
錯補飛
本周一，楊思琦說到女子舉重58公斤級中國的陳艷青（小圖）奪金時，無厘頭說：「厲害呀！呢個女鐵士呀！」當時根本冇人知佢想講咩，不過過了近5秒，才聽到思琦細細聲「補飛」話：「……係女力士呀，好犀利呀！」
丘凱敏騎呢手語
本周一晚，當楊婉儀讀出SMS 遊戲的玩法和禮物，丘凱敏竟不知鏡頭正對住一班主持，望住旁邊的潘宗明指手劃腳，尤如做手語（左圖），但潘又完全冇反應，到丘知道「衰咗」後，自己不禁苦笑。之後畫面播出遊戲網址，但四位主持完全冇提及，到丘凱敏發現，又手指指不發一言，場面頗尷尬（下圖）。
亞視有得揮
講到奧運主持質素唔掂，亞視都有得揮。其中袁彩雲滿身箭靶，就連壓陣的顧紀筠都衰埋，好彩有個專業評述員徐嘉樂（右圖），被讚分析獨到，獲一致好評。
袁彩雲發台瘟
袁彩雲被指齋坐冇嘢講，在幕前猶如蠟像，冇嘢講時所保持的笑容亦十分生硬，難免遭網友狂插，被指是亞視最差主持。
顧紀筠老貓燒鬚
早前顧紀筠表示說話會有分寸，不擔心出問題，但日前她在亞視與apm 同步連線的奧運節目中，介紹「水怪」史畢茲，竟講錯為「史怪」。同日網民即大肆討論，指她不專業，事後顧老闆死撐是一時走音。
珊珊驚青
set 個靚髮首做主持的李麗珊，被網民指只懂照稿讀。在周一中國女排上陣時，當林曉峰問珊珊是否喜歡趙蕊蕊，她根本答非所問，求其話：「啲分數拉得好緊！」之後驚驚青青趕住「交波」俾徐嘉樂。
