姓名：Shopping 精
性別：女
年齡：年年24歲
興趣：行街買嘢、吃喝玩樂、做高溫瑜伽
消費blog
呢排嘅天氣熱到噴火，小妹趁假日都會去沙灘著住三點式Show 吓身材，點知早幾日去泳池游水，俾個Friend 笑我大腿內側嘅毛髮剃得唔乾淨。呢啲位真係好難搞。噚日同消委會嘅老友傾開，佢話如果唔怕痛，對付呢啲喺大腿內側、腋下或者嘴唇位置嘅幼細毛髮，最好用脫毛蠟紙；對付短小、粗硬嘅毛髮，可以用蜜蠟，將毛髮連根拔起，脫毛效果較持久，「但係脫毛過陣唔好太過大力扯，因為會整傷毛囊。」
消委會老友話，怕痛嘅女仔，可以改用脫毛膏或脫毛泡沫，但記住效果唔係咁持久，仲可能引致皮膚敏感，「特別用喺大腿內側、胸部嘅敏感部份，最易敏感，唔係咁適宜塗喺呢啲位。」至於電動剃毛器或者剃刀最方便、快捷，又唔會痛，不過只係暫時性剃走皮膚表面啲毛，萬一刀片唔乾淨，會引致細菌感染，長期剃毛仲會增加毛髮倒生嘅機會。
老友話，無論用邊種脫毛方法，最緊要先測試小部份皮膚嘅反應，睇吓岩唔岩用；避免短時間內用唔同方法脫毛，好似數天內用咗剃刀，就唔好同時用脫毛膏或者蜜蠟。仲有，每次脫毛後都要塗啲乳液。剛脫完毛唔好即刻曬太陽、游水等，同埋唔好用熱水沖洗剛脫毛嘅部位或做磨砂護理。
