曹仁超-投資者日記(16/08/2008)-投資好似奧運奪金

8月15日，周五。恒生指數跌232.13，收21160.58；成交489.6億元；8月期指跌316點，收21021點；9月期指跌316點，成20951點。令人討厭期指倒掛現象仍然喺度。

今年證明對Traders而言係極難賺錢一年；VIX（Market Volatility Index）亦失準。相信係2002年後首次面對咁惡劣環境，通常喺事情轉好之前表現往往更壞，情緒走向極端事前好難捉摸，當愈嚟愈多人認為股市難玩時，極有可能引發惡性拋售，一般散戶喺呢段日子最好持盈保泰，至於有虧損者大多賴股市難玩；踏入熊市二期係孖展客大量減少借貸日子，形成股市成交額漸減。加上7月及8月乃傳統暑假，投資者亦趁機會放假。

熊市二期仲未完

熊市一期通常喺非理性亢奮期出現，例如去年10月30日恒指31958點；一般跌幅大而且急，主要由獲利回吐造成。差唔多所有股票皆跌只有極少數例外。成熟市場好似英美，熊市一期通常只有三個月左右，例如今年1月見底；香港呢類半成熟市場，拋售潮長一點，但好少超過六個月，今年3月18日完成熊市一期，進入熊市二期。

熊市二期特色係投資者認為熱門股已拋售過分，加上經濟本身仲未轉壞，令資金大量流向熱門股，引發熊市中最大一次反彈，例如今年3月18日至5月5日26387點，反彈幅度達28.27％；熊市二期反彈另一特色係集中喺熱門股，二線股反彈幅度反而好有限；喺正常情況下，熊市二期內有三次到六次反彈，時間較熊市一期長。我老曹認為，3月18日起熊二至今未完成，熊二較大部分人估計仲長。

牛熊市乃道氏理論，只係好簡單咁分成三期而冇其他附件。由於比較主觀，後人加咗其他方法去協助分辨牛熊市。方法有：一、指數如下跌20％或以上係熊市機會高達75％。利用上述理論，恒指喺去年12月跌穿25566點（由高峰回落20％），便確認係熊市；二、移動平均數法。即50天線移動平均數跌穿250天（喺外國係200天），亦係另一確認熊市方法，準確度達80％；三、波浪理論法，即一浪低於一浪。如恒生指數跌穿前浪（3月18日20572點）才確認。呢個係家吓仍有人認為唔係熊市理由；四、三分一法，即2003年4月至去年10月恒指升幅三分一失守。由2003年4月25日恒指8331點升到去年10月30日31958點，一旦恒生指數低於24083點，便確認係熊市；五、根據P/E理論。牛市通常喺P/E二十二倍以上結束、熊市通常喺P/E八到十二倍才結束。熊市三期另一現象係熱門股下跌，二線股唔跌（因熊市二期中二線股係咁跌，到咗熊市三期佢地跌無可跌）。換言之，熊市三期恒指P/E只有八到十二倍，同時熱門股係咁跌而二線股唔跌先係入市時機。呢個情況依家都未出現，因此仲係熊市二期。

熊市有幾長？最短三個月（例如1987年10月到88年1月），最長十三年零四個月（例如日本1990年1月到2003年4月），要事後先知。

花旗推介工商銀行（1398），估計今年每股獲利38.5仙，升57.5％，P/E十二倍，目標價6.3元；長江基建（1038）今年估計每股獲利2.39元，升13％，P/E十五點一倍，目標價40.5元；阿里巴巴（1688）估計今年每股獲利28.4仙，上升23.3％，P/E二十九點八倍，目標價11.25元；國壽（2628）估計今年每股獲利64仙，減少53.4％，P/E三十七點三倍，目標價30元。富力地產（2777）今年每股獲利1.25元，升19％，P/E九點三倍，目標價23.64元；美維控股（3313）估計每股獲利3角，升74.9％，P/E六點二倍，目標價2.42元。

中證監再發功

年屆七十八歲著名經濟學家吳敬璉教授對浙江中小企業講話：當前中國經濟發展中面臨難題，喺短期內解決係冇可能。可能兩或五年亦解決唔到；日本1990年至今仍無法從經濟危機陰影中走出嚟，所以浙商應做好長期作戰準備。人民幣滙價上升、工業原材料漲價及勞動力成本上升所造成困局，兩年甚至五年仍冇法解決；只有提高科技含量、唔好急功近利、唔好睇到乜嘢好就做乜、唔好盲目跟風關鍵係做專做精，以及唔好盲目追求大才可成功。

中國經濟剛完成出口及製造業黃金三十年，幾時進入內需繁榮期？要慢慢觀望。

滬深三百指數升0.17％，收2447.61。

中國證監會發言人8月15日就大小非減持問題回應記者時話，將會再出三招去穩定股市。一、引入二次發售機制，完善大宗股份減持市場約束、減震及訊息披露制度；二、可發行可換股債券；三、對國有股份建立實時監測系統、進行申報核實及確定等相應技術準備。

滬深A股由去年10月至今累計跌幅61％，好多投資者虧損累累，加上大量資金流出新興市場及近期大小非解禁壓力唔少。除此之外，中國南車IPO下周上市，恐怕又再引發新一輪拋售壓力。

1992年內地交易所重開之時係唔歡迎外國股份掛牌，直到今年8月6日上述條例先改變。紐約證券交易所希望成為首間喺上海上市外資企業，滙豐同渣打亦希望返去上海掛牌（解放前喺上海掛牌）。外資到上海掛牌可能令去年10月開始A股熊市延長，因為投資者喺比較之下可能將資金用作吸納外來股票而減持A股。內地依家仍禁止資本自由出入、限制外滙買賣及阻止拋空，對外資企業喺上海上市仍有一定唔方便。

金價見788.65美元及白銀見12.65美元。金價由3月17日1032.7美元至今跌咗17％；白銀由21.355美元至今跌咗40％；標普GSCI指數7月3日至今跌咗21％，代表商品價格已進入熊市。

英鎊跌至1.8561美元，較7月31日跌6.4％，係二十二個月新低。

亞洲區外滙亦回落。菲律賓披索跌2.2％，見45.31兌1美元；新台幣跌到31.4兌1美元，呢個係2月25日以嚟最低；新加坡元本月亦跌咗3.5％；馬幣回落1.4％，見3.346兌1美元。資金從四面八方流番去美國。

1966至82年美股熊市共十六年；1990至2003年日經平均指數熊市超過十三年；香港1967年股市起步到1973年見頂後亦上落好幾次，另一牛市喺1983年先正式起步，呢段上落市亦長達十年（1986年才打破1973年高點）。

上次商品熊市由1980年開始，喺2000年結束時亦長達二十年。呢次牛市係咪喺今年7月結束？要事後先知。

投資者切戒大口

美元兌歐羅升到五個半月內新高，見1.4762美元兌1歐羅，即係今年2月21日以嚟最高，但仲未肯定美元牛市係咪重臨。因為美滙指數上阻力78點未破，未出現一浪高於一浪訊號。畢非德、羅傑斯、格羅斯及索羅斯一直公開話睇淡美元，只有索羅斯喺今年6月轉軚（唔係睇好，只係唔睇淡）。美元低潮喺今年3月經過一輪折騰後，7月份至轉勢，至今上升6％。以2002年到今年3月美滙指數回落38％計，至今升幅達6％可能只係熊市另一隻腳。美國銀行喺8月14日建議客戶獲利回吐。

終於全人類從decoupling笑話中醒番，發現只係Delay。由日本到歐洲及由越南到四大金磚國，遲早受次按危機影響而唔可以分道揚鑣。為避開美股回落而轉投其他國家股市者發現自己損失仲大，7月份起資金回流（由全世界返番美國）令美元需求大增。

美國去年第四季GDP出現負增長，歐洲及日本今年第二季都係一樣；美國7月份CPI上升5.6％，係十七年內最大升幅，再加埋中國經濟軟着陸；除咗中東及北非受惠高油價外，全球經濟無晒樂土。德銀估計，今年全球GDP上升3.7％及明年上升3.2％，即係明年較今年仲差。

歐洲央行對CPI態度較美國聯儲局更為鷹派，7月份歐羅區CPI上升4.25％仲唔肯減息。第二季歐洲GDP出現負增長國家：德國負0.5％、法國負0.3％及意大利負0.3％。英國仍上升0.2％，但擔心第三季GDP出現負增長。

根據麥當勞包指數，歐羅較美元最少偏高50％；加上美元轉弱已六年（2002年起計），各位如果唔同意我老曹美元強勢論，亦應該學索羅斯咁保持中立，而唔係好似其他世界名人咁做LAZY BOY。投資唔係一勞永逸事而係好似每天起床漱口刷牙例行公事，每天必需花十五分鐘或以上睇睇數據，諗諗大方向有冇改變唔係乜都唔理。同時切戒大口（Big mouth），講嘢過咗頭而收唔番。無論你係畢非德、羅傑斯或索羅斯，你見解同我老曹見解差唔多（Your opinion is as good as mine），直到事後證明邊個準確為止。世上無先知，更加冇股神（衰神就供應過剩）。

美國人今年暑假歐遊歸來發現歐洲消費勁貴，令歐羅由7月15日1.6038美元開始回落！十年河東、十年河西。

所有銀行資產負債表都係一邊係資產，另一邊係負債。只要資產大過負債便叫有償債能力（Solvent），反之叫冇償債能力。做到呢點方法有：一、資產同負債不斷咁上升；二、資產及負債唔升；三、資產跌價及負債減少。依家歐美各大銀行處景係資產跌價但負債冇減少；為防止銀行陷入冇償債能力，另一方法係增加股本（供股或發行新股），咁樣股數便漸增，每股獲利能力漸減，令每股市價下調。TAF（Term Auction Facility）還債期雖然由二十八天改為八十四天，上述公布只係將短期負債轉為中期負債，仍然係負債並唔係資本，而TAF息率較貼現率2.25厘及聯邦基金利率2厘高；作為銀行自然免得過當然唔借TAF。要動用TAF銀行財政狀況起碼唔健康。

7月鋼材價熱軋鐵平均每噸1106美元，上升56美元；Rebar 957美元，上升56美元；鋼桿1095美元，上升35美元。8月仍有上升壓力，估計每噸可再升10到30美元。至於9月起便唔明朗，估計未來三至六個月鋼材價每噸可跌番80美元，即鋼材價有機會喺今年第三季見頂，因明年煤及鐵礦石供應量上升，踏入第四季鋼鐵廠開始放出明年期貨合約。

中國工廠及地產投資，加上5月四川地震後重建，令中國7月份市區固定資產投資升27.3％，至72200億元人民幣（上半年升26.8％），即中國固定資產投資喺7月份仍全速進行，政府有大量外滙儲備去支持增長，唔使理會出口增長率放緩。估計呢次中國經濟軟着陸需時較估計長。

長期鍛鍊唔好偷懶

全球六十六億人口中，超過二十億喺上周五晚上睇北京奧運開幕典禮，籌備七年費用3億美元，超過一萬五千人參加演出及歡迎來自二百零四個國家超過一萬一千個運動健兒，向全世界展示一個現代化中國，亦係改革開放政策落實三十年後中國，雖然仲係窮但朝氣勃勃。二十一世紀係中國人！去年10月起，滬深A股進入內地股市重開以嚟最大一個熊市。一如美猴王被困煉丹爐七七四十九日，受盡痛苦同折磨，先至煉成銅皮鐵骨及金睛火眼變成齊天大勝。1929到32年美國華爾街危機後，到1937年一個全新美國由大蕭條中冒起，準備日後管治全世界。鄧普頓1935年開始投資美股，當年佢名句：「牛市喺最悲觀日子誕生、喺懷疑期長大、喺樂觀期成熟、喺亢奮期死亡！」接近九十五歲鄧普頓喺生日前過身，留下上述不朽名句。我老曹亦經歷過香港多次最悲觀時刻，例如1967年離開學校到社會做嘢時，唔少親戚及朋友去移民。我老曹因父親早死，冇錢到外國讀書兼移民，被人地批為喺香港死梗；1974年香港出現有史以來最大一個熊市又以為我老曹死梗。經歷過呢兩次大難不死，反而養成不怕死性格。响社會上學習精英致富之道，唔好學習佢地生活習慣；學習企業家精神，而唔係佢地風流艷史。

投資利潤可以無限大，但虧損15％要止蝕，極限係20％。唔使怕波幅，波幅愈大，機會愈多。世上冇一帆風順致富法，卻有點樣將驚濤駭浪生存法。唔好將1萬元變成2萬元，呢個係小孩子遊戲，諗諗點樣將1萬元變成100萬元，甚至1000萬元。年輕人應有冒險精神，但响出發前先好好裝備自己。如果連太平山頂亦未上過，又點可以爬喜馬拉雅山？切忌志大才疏，欲登喜馬拉雅山前必先鍛鍊自己；世界上充滿機會（1967年唔少親戚及朋友話香港冇機會而去咗多倫多，事後證明佢地係錯；1982年D同學話香港冇機會又證明係錯；1989年連至愛親朋亦話香港冇機會，同樣證明佢地係錯）。平均每個月出現二至五次機會，問題係你要把握得到。例如7月份拋空石油期貨，你話可以賺幾多？如果你冇長期鍛鍊又點樣喺奧運奪金？Come On ,Don't be a lazy boy!

投資愈後生開始愈好。二十三歲開始每月投資2500元到六十五歲已擁有1000萬元。生活量入為出，投資要睇中長線。搵個良好投資顧問（唔係股票經紀），多做運動、唔食煙、每天飲八杯水……月有圓缺、人有悲歡；牛市中保持平常心，熊市中持盈保泰。男仔約會女仔然後一齊使錢；慢慢買佢地負擔唔起嘢而陷入借貸，債上再加債最後連借錢畀佢地金融機構都因呆壞賬太多而執笠。解決辦法得一個──量入為出，開始儲蓄。只係咁樣一嚟全世界金、銀、銅、鐵及石油都要跌價，全球經濟陷入衰退。Meredith Whitney係去年預見次按危機出現分析員，佢家吓正預見上述情況將出現。未來銀行倒閉事件較Jack and Jill roll down the hill仲多。CNN報道加州過去十二個月出售二手樓中，有63％係蝕本，以及拉斯維加斯60％要蝕本，最差係Merced 74.9％賣樓者係蝕本賣出。格蛇話樓價今年年尾見底？只係佢一廂情願想法。

T Boone Pickens今年八十歲。1951年佢喺地理學系畢業後加入Phillips石油公司；1956年同人地借咗2500美元做資本而搵到自己第一口油井；1981年佢Mesa石油公司係全球最大私人石油公司。今天佢已富甲一方，去年只係私人捐款數目已達2億美元，估計佢今天財富達數百億美元。證明成功同開始時有幾多資本係冇關，而係有幾多智慧。