《街霸》可以話格鬥Game 王道正宗（21年），機齡有番咁上下都會知「波極」、「睇腳」係乜東東。隔咗咁多年，《街霸4》終於正式抵港，唔同年代嘅高手亦紛紛出山，搞到機舖又再人山人海。經初步測試，唔識新系統都可以當佢係二代咁玩，但挑機方面卻神神化化，由於Link 晒機兼Random 決定挑戰者，輸咗想「覆焯」都唔係咁易！
文：陳福榮
攝影：陳盛臣
鳴謝：Game Zone （Megabox 、新之城）
舊人好抽過新人？
喺街機斷纜多年，萬眾機迷期待嘅《街霸4》終於登陸香港機舖！經典角色招式全數保留咁滯，Ken 、Ryu 依然波、昇、旋風腿，軍佬仲係手刀、腳刀、屈中腳做牽制，真係招表都唔睇就可以埋位開拖。雖然佢整咗4名新角色，但可能大家仲係念舊心切，又或者新人實力強差人意，暫時日本網站都將泰王、Ryu 同蘇聯佬列為最強Top 3。蒙面摔角手則因連招太煩、力量太差，慘成為目前最唔受歡迎角色添！
1.識上下波同手長腳長嘅泰王，暫時被譽為最強角色。
2.睇新女角Crimson Viper 打開個心口好似好削，其實又火又電，竄擾性強
3.蒙面摔角手El Fuerte 招式睇落好華麗，衰在攻擊力弱防禦亦低。
4.成個波咁嘅Rufus 動作騎呢，但勝在大力兼出奇地郁得快。
■捕準對手出招按Saving ，雖然硬擋照舊扣血……
無Blocking 靠Saving
如果宏觀咁睇《街4》，不難發現佢個畫面表達極似舊《街霸EX 》，3D 背景，但打起嚟點都係傳統平面。系統則可當成《街霸2X 》同《街霸3》混合體，每場只可發動一次Super 來自前者，刪除Blocking 但加番《街霸3》嘅EX 技同Target Combo ，集兩者優點於一身。冇咗Blocking ，取而代之係更具備反擊成份嘅Saving Attack ，留意雖然按住中P 中K 即可發動，不過只能硬擋一兩下，俾人連續輕拳就可以監生打爆，結果得不償失。
■8名顯赫戰將再加四天王，暫時比較得普遍玩家歡心。
初學模式助練功
個多星期前《街4》初落場時最高叫價$10鋪！雖然而家回落至$6鋪，但對機迷實在幾高消費！好彩遊戲除普通故事模式，仲新加入訓練模式，好處係頭3場唔准人挑機、硬打電腦（第4場開始就各安天命喇！）；不過亦有啲老手會用訓練模式嚟練習連招，當真係一個非常體貼嘅設計。講開亂入挑機，有件事一定要提，《街4》佢預設要4部機Link 埋，挑戰對手無得指定，要由電腦隨機挑選；除非另外兩個人仲搏緊命，你先可以做到確實搵指定啲對手嚟挑戰。
■呢件大佬係司令旗下嘅反骨仔，睇佢冇啦啦唔著衫肯定唔慌好人。
■佢個樣勁似《街霸3》嘅Gill 同Urien ，留意粒太極波識得吸人落肚。
■即使係午飯時間，旺角大場都企滿想重拾舊夢嘅《街霸》迷。
外置靚芒會眼花
今次《街4》另一大賣點係玩高清！某啲入咗水貨嘅機舖，出Game 要連高清機殼返，感覺最原汁原味；入行貨機舖通常只買遊戲板，機身就用番傳統4:3芒舊殼，打機時畫面好似有啲變細咗，不但壓迫感減少，出招擋招時距離感都要重新適應。不過有啲醒目機舖如新之城，就喺機殼外加裝16:9LCD ，效果絕對唔會比日本版輸蝕，不過部份機迷聲稱望得耐呢隻芒，會睇到眼花又頭暈，唔通真係要「玩一粒鐘，抖15分鐘」？另外，喺可見嘅將來香港係唔會引入記憶卡系統，想幫阿隆春麗改色換衫都唔得，惟有出年等家用版推出先至享受呢啲啜核點子啦！
Profile
機種：AC
廠商：Capcom
類型：FTG
人數：1-2人
價格：每局$6
