我係小巴！主人，我好想食啊！
近年香港人注重飲食健康，所有食物都話要「有機」，而家呢種風氣甚至吹到寵物界。好像Foreverpets 老闆娘Cheire ，她本身是愛犬之人，為了寵物的健康，於是四出搜尋健康狗糧，在網上發現不少寵物主人原來都有相同的煩惱，於是索性開網上商店，專售健康寵物食品，誰知竟然發展成一門獨市的生意，4年內由online shop ，做到連開兩間分店！
今次我們還請來主演《當狗愛上貓》的人氣狗仔「小巴」試食健康食品，睇吓係咪一樣咁滋味！
作風低調的Cherie （右）與拍檔一直不願拍照，不過面對愛犬肥波，今次便破例影張側面大合照。
Cherie 以贊助貓狗會活動作宣傳，這次便是贊助狗會「八哥街市」，送贈狗糧作禮物。
「如果你隻狗仔唔肯食健康糧，你就試吓溝入其他糧，慢慢加多啲，就可以改變到佢哋嘅飲食習慣。」Cheire 正與客人分享飼養寵物心得，該店跟一般的寵物用品店不同，店內售賣的食品和用品全部成分天然和健康，包括乾糧和零食等。
據Cheire 說，健康食品跟其他寵物食品不同之處，就是沒有加入人造色素、味精和化學防腐劑，她曾搜尋大量相關資料，顯示寵物長期食用這些食品，會較容易患上腎衰竭、糖尿等疾病。「大部分超市買到嘅寵物罐頭，都加咗味精去吸引寵物食，其實好影響佢哋健康，有個客經常餵佢隻松鼠狗食罐頭，結果狗仔兩歲已經有糖尿。狗仔亦要盡量避免食含有小麥、玉米或黃豆嘅狗糧，因為會容易引起皮膚敏感同影響腸胃，所以最近我都引入埋一系列無穀物嘅健康食品，減低令寵物致肥同敏感嘅機會。」
本身養了3隻貓狗的熟客謝小姐，平均每兩星期便會幫襯，「我好錫啲寵物，好想佢哋身體健康，之前一路都想搵健康食品畀佢哋，可惜其他鋪頭最多入一、兩個牌子，好少選擇，後來知道呢度專門賣健康寵物食品，就嚟幫襯，估唔到有咁多選擇。」
熟客謝小姐幫襯了3年多，自覺寵物進食健康食品後，病痛少咗。
還有一些關於寵物的商場show ，雖然在backdrop 上只得一個細logo （紅圈），Cheire 亦樂意贊助，努力與各機構建立合作關係。
搞贊助 做宣傳
雖然寵物健康食品售價較其他牌子貴近一倍，如健康狗糧一包便要$150至$250，其他狗糧則只需$80至$120，但Cheire 的店仍然有一大班捧場客。「我嘅客群大部分係中產以上階層，佢哋極之注重寵物健康，明白健康食品對寵物好重要，都捨得花錢。」她指客源一直不是問題，起初由網站起家，在yahoo 賣廣告，一開始反應已經很熱烈，「我哋搞網站唔似其他網上寵物商店咁只show 啲產品出嚟，而係會加入一啲關於寵物嘅資訊同活動資料，仲有寵物領養區，咁樣除咗可以幫到啲寵物同主人，亦係吸引客人瀏覽。」
Cheire還與其他狗會網站合作，用電郵聯絡版主，提供優惠給會員，藉此建立聯繫，如Chihuahua Club 、香港金毛會等，吸引更多狗主注意，現時已與超過10個貓狗會網站合作。「我亦會贊助啲貓狗會活動，例如提供產品做禮物等，每次出席活動，都可以向幾十個主人做宣傳，效力好大，好過賣廣告，因為呢啲係真正用家，屬於針對性宣傳，一定岩target 。」
由於寵物進食含碳水化合物的食品，容易引致皮膚敏感，故Cherie 引入無穀物系列食品每包（3.64kg ）$618。
脫水小食把水分抽走後，不用添加防腐劑，也可保存達半年以上，但仍能保存食物營養，分三文魚、吞拿魚等多種口味售$78。
主打美國食品
Cheire說最大難題，反而是剛開業，網上店沒名氣，許多批發商都不肯供貨。幸好marketing 出身的Cheire ，懂得與批發商周旋，花了2、3個月時間接洽。「其實好多外國牌子嘅健康食品喺香港都有批發商，不過好多都唔肯批貨畀我哋，我惟有逐間打電話搵佢哋傾，後來先知，原來佢哋驚我喺網上店會賣得好平，我哋就應承佢哋唔賣低過指定價錢，於有幾間就肯批畀我。」
Cheire主要揀選美國出產的健康食品，因美國飼料管理官方協會，有一套嚴謹的寵物食品的標籤規章，必須列明食品的成分，否則會被控告，所以產品有質素保證。「每次我入一個牌子都會睇清楚產地、成分材料等，先至會入貨，買咗返嚟，仲會畀自己啲狗狗試食先。」
由網上到上樓，取得貨品開鋪後，Cheire 又遇上另一難題，就是送貨。她與拍檔起初以兼職形式經營網站，投資成本不足10萬，客人在網上訂了貨，他們便在晚上送貨，後來訂單多了，根本送唔切，Cheire 便與幾位貨車司機合作，委托司機去送貨。「我哋喺正職一放工，就要安排司機送貨嘅時間表，每晚派兩架車，由晚上6點送到10點，每晚指定去唔同區送。」雖然能解燃眉之急，但請司機送貨成本貴，約佔每張訂單的總額4成左右，所以Cheire只好要求客人買滿$200才送貨，又增設會員制，給予優惠會員，希望他們能一次過訂多些貨，減輕運輸成本。
許多人認為健康食品不夠美味，會令寵物產生抗拒，今次請小巴試食這款脫水牛扒小食（價錢$98），小巴竟然食唔停口，一會兒已吃掉半包，證明寵物健康食品亦可以好好味。
Cherie 第一隻飼養的唐狗，因癌病逝世，令她開始著重寵物的飲食健康。
添新產品 增競爭力
後來客人愈來愈多，Cheire 索性辭職，去年於荃灣開設樓上鋪擴展生意。「主要係想有個showroom 畀啲客上嚟購物之餘，又可以交流養寵物心得。」有了自己鋪頭，加上行內已有一定知名度，向批發商嗱貨已不成問題，「一開咗鋪嗱貨真係容易好多，近呢1年我就搵咗十幾個牌子返嚟，而家已有超過50個牌子產品。」
其實寵物健康食品跟人類食有機食品一樣，已成大勢所趨，近年已愈來愈多店鋪引進寵物健康食品，甚至連早前的第三屆寵物展，亦大打健康牌，推介狗狗跑步機、零反式脂肪寵物小食等，所以健康食品市場潛力龐大。「我哋開咗4年，每年生意額都有20%以上增長，而且以中高檔嘅客人為主，佔一半以上，佢哋買嘢唔會介意個價錢，重點係睇啲食品嘅成分同營養，有啲客每次都會買過千蚊貨，所以我對呢門生意嘅前景有好大信心。」雖然競爭大咗，不過Cheire 指店鋪已有一定規模和客群，所以不怕被搶客。「我哋最近都增加咗好多其他寵物健康用品，如全天然驅蚤劑等，選擇愈嚟愈多，希望可以增強競爭力。」
除了健康食品外，Cherie 近年還引入其他天然寵物用品，這支天然驅蚤噴霧$99。
因應客人要求，Cherie 亦加入一些狗仔服飾，擴大客路，藍色橫間狗仔衫$118。
創業 全因家中愛犬
其實養了3隻狗仔的Cheire ，04年創業全因擔心愛犬健康。她小時候家中養了隻唐狗，家人每天餵吃剩的飯菜，結果狗仔未到10歲已經要開幾次刀做手術，花掉4、5萬醫療費不特止，狗仔還不斷受苦，後來狗仔還患上胃癌去世。之後Cheire再養寵物時，便十分注重狗仔健康，現時14歲的北京狗，仍然健康冇病，「寵物係咪健康唔可以話全部關飲食事，但一定係其中一個主要原因。」
多年來，Cheire 一直不停搜尋寵物的健康食品，發現香港的選擇太少，「因為以前啲人冇咁注意飲食健康，加上寵物健康食品比較貴，好多寵物店驚冇市場，好少會入。」於是她為了幫助其他跟她一樣注重寵物飲食的主人，04年便決定開設網上商店。
現時Foreverpets 每日均有30至40張訂單，每月盈利達5萬。Cherie於今年初又在銅鑼灣開多一間樓上鋪，希望吸納埋港島區的客人，寓工作於興趣又賺到錢，Cheire 說她已很滿足，不過送貨問題仍然困擾著她，「有唔少客人要求日間送貨，有時我哋都要自己出動，但都送唔晒，所以我已經計劃買車同請司機，開自己嘅車隊，咁就可以全日送貨。另外，為咗鼓勵客人親自到鋪頭買嘢，我都推出一系列優惠吸引佢哋，好似畀折扣、現金券等，希望可以減輕送貨量。」未來Cheire 不打算再開分店，因為她最大的心願，還是喚起主人對寵物健康的關注，「我希望第時抽多啲時間，搞多啲講座同活動，令寵物主人知道健康飲食嘅重要。」
去年Cherie 在荃灣開設showroom ，今年再於銅鑼灣（左圖）開分店，希望吸納不同地區的客人，並想減低送貨的運輸成本。
開業成本
網站：$8,000
入貨：$80,0000
總投資：$88,000
每月開支
租金：$35,000
網站：$5,000
入貨：$500,000
運輸：$30,000
人工：$35,000
雜項：$8,000
營業額：$663,000
盈利：$50,000
Foreverpets
網址：
http://www.foreverpets.hk/
電話：63080328
點樣入貨
Cheire指香港的寵物食品主要有兩種途徑入貨，一是向正式代理取得的行貨，二是向牌子當地分銷商的水貨，但水貨質素冇保證，如保存期、生產日期都可能有問題，所以為安全起見，最好向代理或批發商嗱行貨。
想取得代理的聯絡方法，可以透過產品的招紙，或者上網搜尋，然後可以直接致電畀佢哋，通常對方會要求得到公司背景、經營模式、已售賣什麼產品等資料，若果本身已有店鋪，一般都可以嗱到貨，如果像Cheire 當年初初開業，就要逐間碰運氣。
而代理商有時候會同時代理幾個牌子，啲貨前可以先查詢，並要求嗱少許貨辦研究吓。
