招牌動作龜波氣功當然走唔甩啦，仲有埋手掌parts 畀你換方便擺元氣玉甫士。
都話《龍珠》呢期hit 到癲，睇完《龍珠》展，即刻有玩具睇。
雖然電影版《龍珠》要到出年3月13日先有得睇，不過靠《龍珠》發達又唔只星爺同發哥，仲有一班玩具炒家。上星期Medicom 就推出12"悟空figure ，話晒係M記首隻《龍珠》figure ，估計可以由原價$799炒到過千。成班玩家一早舉高雙手，唔係畀元氣，係畀錢呀！
有網友就嫌悟空表情木獨同埋條腰太幼，但係筆者就覺得合埋口cool 啲型啲，條腰太幼係方便做動作，覺得唔好睇就唔好拉咁實條腰帶咋！
悟空咁炒得，因為超人玩具黃sir 賣得平，$799就可以帶返屋企，難怪黃sir 都話炒硬，而家唔買就一定後悔︰「我都估唔到咁好賣，兩日賣咗幾百隻，係我哋開檔以來最好賣嘅12吋公仔！以前嚟買12吋嘅多數係3、40歲嘅客居多，但今次M 記版就有唔少係20幾歲嘅客，證明呢隻嘢吸引力強，帶嚟一班新客仔！」
售價︰$799
查詢︰超人玩具（23662688/ 旺角兆萬中心222鋪）
超西版悟空都係12"，一頭金毛兼且個胸大隻，仲可以玩埋瞬間轉移添！
魔童會喺12月同超西悟空拍住上，預售價係$900，睇岩就快啲落訂。
後補佳麗！
走咗寶，咪心痛，嚟緊仲有笛子魔童及超西悟空，呢兩隻已經收緊訂，快啲去畀錢！
《少年Jump 》40周年玩具晒冷
其實唔只《龍珠》人氣勁，今年適逢日本漫畫週刊《少年Jump 》40周年紀念，以佢哋旗下為名推出嘅玩具都係矚目之作，好似同場加映仲有《One Piece 》、《Naruto 》同埋《Bleach 》嘅特別版figure ，一套5隻賣$280，睇嚟動漫人物今年應該會繼續hit ！
