Turbo SIM 條橋一被證實可以用喺iPhone 3G 身上，班水貨佬即刻大手喺美國買機返嚟，擺到成間鋪都係機；$6,680同$7,680算係而家最平嘅價位。
等咗咁耐，iPhone 3G 水貨終於到！幾錢？8GB 盛惠$6,680，16GB 加一千，$7,680。
比行貨淨機平咗千幾兩千蚊，啲人係咪興奮？又唔係喎，先達個市出奇地平靜。點解？因為仲未有軟解咋，係要用Turbo SIM 嚟打電話㗎！估唔到上年賣iPhone 2G 時已經out 咗嘅Turbo SIM ，居然可以翻生，不過要剪到自己張SIM 咭溶溶爛爛，啲人實唔鍾意，而且而家啲水貨用3.5G 上網又時得時唔得，所以咪冇乜港客買咋。反而大陸冇3.5G 用，大陸人反而唔care 部機上唔上到網，當啲機係2G 版咁掃上大陸。
16GB 行貨賣$9,180，隔籬寫住可用任何SIM 咭嘅16GB ，就係澳洲冇SIM lock 水貨，只爭$500，買行貨好過。
冇lock 水貨勁貴
而家先達啲水貨好混亂，間間鋪賣嘅機都唔同，有啲要剪SIM ，有啲又唔使喎。唔使剪SIM 嘅機，功能最完善，直插咩台SIM 咭都打到電話、上到網。梗係啦！因為啲機根本冇SIM lock ，其實係由澳洲嚟嘅水貨，過邊只要畀錢網絡商，就會幫你解SIM lock ，但咁入貨返香港賣成本勁貴，所以賣街價大約要8GB$7,880、16GB$8,680，即係只係平過行貨淨機幾百蚊，鬼有港客買，可以不理。
啲鋪頭已即時五顏六色大大隻字寫畀人知佢哋有美版iPhone 3G 賣，不過月費束縛個「朿」寫錯字喎。
查實Turbo SIM 只係呢類咭貼嘅統稱，而家用於iPhone 3G 嘅黑色呢張，正式名稱叫PSS SIM ，係Turbo SIM 嘅進化產物，不過大家叫慣咗，所以繼續叫佢做Turbo SIM ，用法係剪走SIM 咭一角，貼落呢張嘢，再插入iPhone 。
可能冇乜人會留意美版機（左）同香港行貨（右）嘅包裝有乜唔同，其實行貨個盒係大過美版好多㗎。
睇埋入面嘅配件，行貨（右）有原裝三腳插，水貨就要自加二腳變三腳蘇頭。
Turbo SIM 鑊氣重
用Turbo SIM 解過批iPhone 3G ，就係美國AT&T 有SIM lock 嘅機。原本Turbo SIM 係用唔到3.5G 、EDGE 、GPRS 等任何制式嚟上網，但班整機佬夾硬抄啲data 落去張Turbo SIM 度，又可以令到啲iPhone 3G 用到3.5G 上網喎。不過呢招好唔完善，插3仔SIM 咭又會失效，又因為唔同整機佬手勢問題，或者張Turbo SIM 版本唔同，所以有啲鋪頭賣嘅iPhone 3G 淨係插某個台嘅SIM 咭先上到網，總之勁重鑊氣，賣機班友又冇試清楚，問佢哋都口啞啞，咁唔穩陣，梗係唔好買住。
以呢間鋪為例，冇耐前收iPhone 2G 仲收緊8GB$3,500同16GB$4,500。
但係最近就擦咗中間個「5」字，改成$3,700同$4,700，出高人哋$200，博多啲客去放機。
大陸同胞再掃iPhone 3G
iPhone3G 水貨冇港客吼，班先達友都唔怕，因為可以同iPhone 2G 一樣賣上大陸。你可能會問，大陸佬唔用3G 功能，買iPhone 3G 咪好蝕？其實iPhone 3G 同2G 個價相差唔係好多咋！因為而家全先達已經冇晒iPhone 2G 咁滯，於是炒貴賣上大陸，會賣成8GB $5,800同16GB $6,800，咪即係同iPhone 3G 水貨只爭$1,000左右，但啲3G 保證係全新機，唔係翻新鬼機喎，所以唔少大陸佬寧願買iPhone 3G 㗎！雖然係咁，回收iPhone 2G 去翻新成鬼機賣，因為利錢更高，所以仍有人繼續出高價收機，最近個回收價又升咗，8GB 同16GB 各升$200，去到$3,700同$4,700。你用厭舊iPhone 嘅話，而家放真係冇蝕底。
繼續等跌價解鎖啦！老友
講咁耐，如果你仲係好想買iPhone 3G 水貨咁點呀？電機兒勸你都係等軟解先啦，反正iPhone 2G 咁多個版本firmware 都冇一個係黑客破解唔到，軟解相信只係時間問題。同埋之前我都為大家計過晒數，喺美國AT&T 買機返嚟，計晒所有成本都唔過$5,000，即係話而家個水貨價仲係貴，起碼等佢跌多$1,000，賣$5,880或以下先合理！畀啲耐性啦！
