阿Sa 爆鄭中基「好多紋身」
阿Sa 提起鄭中基（小圖）的手臂有愛的紋身，不時甜絲絲露出冧樣。
日前林嘉欣踢爆鄭中基手臂上有紋身，與盛傳他曾為蔡卓妍（阿Sa ）而紋愛的紋身不謀而合，阿Sa 前晚被問及此事時，只是甜笑說：「佢一向都有好多紋身！」她表示與拍檔鍾欣桐（阿嬌）保持聯絡，但不知Twins 何時開始工作，現在惟有當作休息。
容祖兒自言曾與阿嬌聯絡，並會支持她工作。
Hotcha 穿上短裙仔，勁歌熱舞大唱《小野蠻》。
蔡卓妍、容祖兒、泳兒和Hotcha 等前晚在無線將軍澳電視廣播城錄影《勁歌金曲》，今次以奧運為主題，故演出的歌手均唱奧運相關歌曲。阿Sa 首次脫離Twins ，以個人名義演唱歌曲。
日前林嘉欣在公開活動中踢爆鄭中基手臂上有愛的紋身，阿Sa 前晚表現勁冧不停甜笑，她說：「係咩？講者無意，聽者有心。」盛傳鄭中基手臂上的愛的紋身是為了阿Sa 而紋，她說：「叫我點答呀，佢一向都有好多紋身。」
唔知幾時會阿嬌
問阿Sa 可會為愛人紋身，她說：「我好怕痛，細個穿耳窿都怕痛，仲差啲暈。有想過紋一個梵文圖案，不過我連肚痛都頂唔順，最後冇紋到。」記者打蛇隨棍上，問鄭中基為她紋身可有感動，她苦笑說：「你哋唔好得寸進尺喎！」
有指英皇以500萬為鍾欣桐打造全新形象復出，阿Sa 說：「咁又唔知喎，總之要畀多啲機會佢。」日前阿嬌在浙江一個女子籃球冠軍賽擔任開球禮嘉賓，相信是為復出鋪路，阿Sa 說：「我同佢有保持聯絡，大家有互相鼓勵，我唔知Twins 幾時先再一齊，而家咪當休息先。」
問阿Sa 覺得阿嬌選擇在內地工作，對她是否更好時，阿Sa 說：「今次佢唔係正式復出，只不過係出席一個有意義嘅活動。至於幾時喺香港工作就未知，而家阿嬌學緊打拳同跳舞。」
對於英皇用500萬為阿嬌打造新形象，祖兒說：「我都有同阿嬌聯絡過，但係冇聽過喎，唔好傳得咁誇張，等佢自自然然，簡簡單單咁去工作，幫佢係用心，咁先係無價。」
阿嬌心願做打女
英皇高層霍汶希（Mani ）昨日接受商台電話訪問，否認擲銀彈安排阿嬌復出，她說：「佢出嚟係要睇佢有幾多進步，總之喺適當時候就會做適當嘅嘢，會接多啲打片，因為佢多年嘅心願就係做打女。至於進軍荷李活就好難，要英文好、做戲好，需要好長時間，所以梁洛施真係好幸運。」
採訪：楊潔雯
