早排衞詩著住呢對六吋高高踭鞋拍攝唱片封套，因為唔小心差錯腳，
呢個十呎高嘅山坡跌咗落地，搞到八月十五瘀晒，因為佢唔想老闆黎明擔心，堅持唔肯去醫院睇醫生。
即將推出全新大碟嘅衞詩，為咗
形象上同家姐衞蘭分別大嘅，專登剪短晒嘅頭髮，仲唔介意deep V 拋胸走性感路線。
八珍聽聞，衞詩嘅唱片宣傳費高達七位數字，但其實呢筆錢，原本係預留俾家姐衞蘭出碟嘅時候用，但最近因為佢工作表現懶散，俾老闆黎明order 「急凍」，衞詩最終臨危受命接棒上陣。
忽然得寵，衞詩自動波嗌減肥，甚至以性感形象出擊，但據聞因為壓力太大，驚做得唔夠好辜負公司，令衞詩脫髮問題險再出現。
八珍都好體諒衞詩嘅心情，始終機會係無take two ，好在黎老闆錫番，百萬宣傳費用大部分落
雜誌同電視廣告之上，衞詩唔使東奔西跑四出做宣傳，壓力細咗，三千煩惱絲仲保得住。
修身後嘅衞詩，唔怕騷本錢晒身材，更方便歌迷分清楚佢同家姐，一舉兩得。
剪去長髮嘅衞詩，感覺上清爽得多，對於呢個型格性感路線，老闆黎明都讚不絕口。
黎明一向痛錫衞蘭（圖右），但近排已將全副精神，寄託在細妹衞詩（圖左）身上。（忽然1周圖片）
衞蘭唔聽話被「急凍」，衞詩唔想步家姐後塵，已答應公司只會專心工作，將感情事放埋一邊，似乎佢同關楚耀嘅戀情同樣要「急凍」。（忽然1周圖片）
