煞科戲拍裘俊同Diana 結婚，所有「形」嘅新舊同事，除咗關詠荷冇到外，幾乎全部到齊，連監製曾勵珍同編導都嚟打氣，場面熱鬧過真正婚禮。
無線處境劇《同事三分親》會喺奧運開幕前，8月7日播埋最後一集、即係第364集，就同大家拜拜啦！
唔經唔覺，《同》播了足足年幾，雖然主線之一嘅關詠荷半途退出，但口碑及收視（開初到依家一直保持喺28－29％）依然比以往處境劇好。《同》主打辦公室趣事，好似發生喺你同我身邊；其次冇婆媽嘮叨；而最值得讚係劇入面演員大部分名不經傳，但人人有戲。《同》就似一個飯後免費甜品，如今要同一班日日見慣見熟嘅同事講拜拜，又真係有啲唔捨得！
讀者如果係擁躉嘅話，不妨將呢張《同》開拍時嘅大合照與隔籬張煞科相嚟個大比併，睇吓少咗邊個？又多咗咩人？
《同》開播初期，三個主線人物黃家嵐（關詠荷），Vincent （黃子雄）同Diana （江欣燕）不時四出做宣傳。
金燕鈴同石修飾演嘅「型男廚神」呢段黃昏戀，觀眾不但唔覺肉麻，相反不知幾受落添。
一嫂（湯盈盈）抱住呢個BB ，唔係佢同阿一（布韋傑）個仔，而係文丞君（郭少芸）同武紀勇個仔嚟㗎！
《同事三分親》終於落幕，雖然只得三百多集，唔及《歡樂今宵》長壽，不過，始終都係過句：見好就收﹗就係最明智嘅做法。
曾經有電視人講過，處境劇唔好做，雖然無線搞處境劇已算在行，亦都唔係套套掂，《同》可以算係神話。佢嘅優勢係內容食正香港「潮」嘢，好似辦公室政治、OL 生活，再加上依家潮流最興嘅「廚神」，就算每集古仔有啲過分堆砌，就如江欣燕飾演嘅Diana 做起嘢嚟六親不認，楊英偉嘅黃國立賤到出汁，無傷大雅之餘又俾到觀眾共鳴感。
話咁快，《同》做到８月７日（星期四）就鳴金收兵，根據無線處境劇慣例，大結局當然要happy ending 啦，《同》亦唔例外，除咗一班同事各有發展外，仲特意安排徐榮飾演嘅裘俊越級追Diana 成功，有情人終成眷屬。此外，仲為滿足觀眾對黃家嵐同Vincent （黃子雄）呢pair 嘅關心，特意喺劇入面交代Vincent 會去外國同黃家嵐結婚，算係皆大歡喜！
歐錦棠飾演嘅武紀勇，最後都算修成正果，同郭少芸飾演嘅文丞君成為一對，而且兩人仲有個仔添；而鑽石王老五Vincent ，就會交代佢會去外國同黃家嵐結婚。
蔡淇俊飾演嘅陸哲，喺劇入面先後同彤彤（陳自瑤）、美美（梁政鈺）、同陳茵媺（右）飾演嘅安娜有感情線，最後無疾而終，而陸哲亦會去美國讀書。
大茄崛起
《同事三分親》一班演員，除咗江欣燕、陳鴻烈、石修一班老戲骨之外，其他演員大部分演《同》之前都係「茄類」植物，但經過《同》嘅訓練，一班大茄紛紛崛起。當中表表者非演樓華嘅王祖藍莫屬，而飾演秘書Doris 嘅簡慕華亦乘時而起，不過講到最受歡迎嘅，點數都係「風塵三俠」啦！
武紀勇、Marco 及Gray 俾同事封為「風塵三俠」，既搞鬼又抵死。當中演Marco 嘅趙永洪（右）依家更係「聲名大噪」，最受歡迎。
簡慕華都撈咗大茄好耐，估唔到喺《同》入面飾演既穩重又盡責嘅秘書Doris ，大受歡迎，最後仲加插佢同「廚房男」黎耀祥一段感情，更加搶晒戲。
五呎爭半吋嘅王祖藍，憑樓華成為無線新「喜劇泰斗」，既拍劇，又主持，依家仲出埋唱片。
退隱多年嘅粵劇老牌花旦吳君麗，唔再係「古裝人」而係穿越時空做一個摩登貴婦；亦係鄭欣宜劇中嘅姨媽。
我哋竟然有機會合作！（設計對白）同關詠荷一樣觀眾緣甚佳嘅毛舜筠上次演唔成《同事三分親》，今次加入新劇，佢嘅喜劇細胞可盡情發揮。
鄭欣宜係新劇主角之一，做一個開心少女；都算開正佢過瓣。
《潮》湧而至
大家唔使為「形」呢班同事擔心喎，事關接替「形」廣告公司嘅，係新嘅「潮」雜誌社，內容大致都係辦公室糾紛同家庭瑣事為主線。演員幾乎係《同》原班人馬外，當然，新劇必定有新人加入，「潮」就有鄭欣宜同飾演佢姨媽嘅吳君麗及毛舜筠。但據曾勵珍透露，新劇陸續有新人加入，肯定好熱鬧。
