學徒會跟師傅學習零件運作及進修等。
會考岩岩放榜，長期失業嘅黑仔明驚成班會考生出嚟打崩頭搵工，所以早前已經積極四圍搵，今個禮拜就會去九龍巴士個招聘日，碰吓運氣。原來九巴喺嚟緊嘅星期四，會招聘約20位學徒學維修巴士。最吸引係入職要求唔高，毋須工作經驗，只要中四或以上程度、或者中三程度並已經修讀VTC 全日制課程1年就去得in 。
黑仔明仲懶嚴謹咁做過資料搜集問過招聘部，佢話當日有得即場面試，基本上都係簡單對答，睇下求職者對工作嘅興趣同性格咁，如果取錄咗，就會喺荔枝角、九龍灣、沙田或屯門其中一個地點返工，每個星期返工6日，每日8個鐘。一講到人工，黑仔明就黑起塊面，佢話原來每個月只得$4,935，「如果唔係因為佢哋有齊醫療福利同員工免費乘車證，我點都唔吼！而且招聘部講過，話培訓過4年，期間每年都有機會調整薪金，每次約有百分之三至七嘅調整，算好過冇咁啦。」而學徒喺培訓期間，公司仲會資助佢哋修讀汽車維修嘅課程，資助金額就要視乎課程嘅長短而論，一般會資助一半。學徒完成培訓之後，表現得好，會有機會獲聘做技工，人工近一萬蚊。「佢哋話喎，之後做得好，最高可以升到去測驗總技術員，甚至係管理階層，人工可達2萬以上。」對一啲有興趣於汽車維修嘅年輕人嚟講，都可以考慮一下。而招聘會即場面試，求職者最好先致電預約，同埋要帶齊履歷表、學歷證明嘅正副本等出席。
招聘日
日期：8月7日（星期四）
時間：下午2時15分至下午4時15分
地點：勞工處大埔就業中心
電話：26541434
